បុរសដែលត្រូវគេចាប់ខ្លួន ពាក់អាវពណ៌ផ្កាឈូក
ស្នងការរងថៃម្នាក់ បានឲ្យដឹងនៅក្នុងសន្និសីទកាសែតមួយ កាលពីថ្ងៃព្រហស្បតិ៍ថា នាយកដ្ឋានបង្ក្រាបឧក្រិដ្ឋកម្មបច្ចេកវិទ្យាថៃ បានទទួលដីកាចាប់ខ្លួនជនសង្ស័យ ឈ្មោះ ហេង រតនៈ (Heng Ratanak) អាយុ ២១ ឆ្នាំ ជាជនជាតិខ្មែរ កាលពីថ្ងៃពុធ។ ជនសង្ស័យរូបនេះ ត្រូវបានចោទប្រកាន់ពីបទបង្ហោះព័ត៌មាន ដែលអាចធ្វើឱ្យប៉ះពាល់ដល់សន្តិសុខជាតិ ឬបង្កឱ្យសាធារណជនភ័យស្លន់ស្លោ ក្រោមច្បាប់ឧក្រិដ្ឋកម្មកុំព្យូទ័រ។ប្រសិនបើត្រូវបានរកឃើញថាមានទោសមែន នោះជនសង្ស័យឈ្មោះ ហេង រតនៈ អាចនឹងត្រូវជាប់គុករហូតដល់ ៥ ឆ្នាំ និង/ឬ ពិន័យជាប្រាក់រហូតដល់ ១០ ម៉ឺនបាត។
ជាមួយគ្នានេះ ជនជាតិថៃ ៦នាក់ផ្សេងទៀតក៏ត្រូវបានចាប់ខ្លួនផងដែរ ក្រោយចែកចាយបន្តព័ត៌មានមិនពិតនេះ។ ពួកគេទាំង ៦នាក់បានសារភាពថា ខ្លួនពិតជាបានចែករំលែកអត្ថបទនេះមែន ប៉ុន្តែមិនមែនក្នុងគោលបំណងអាក្រក់ណាមួយនោះទេ។
ទោះយ៉ាងណាក៏ដោយ ប៉ូលិសឲ្យដឹងថា ជនសង្ស័យទាំង ៦នាក់ត្រូវប្រឈមនឹងការចោទប្រកាន់ពីបទឃោសនា ឬបញ្ជូនព័ត៌មានមិនពិត ដែលធ្វើឲ្យប៉ះពាល់ដល់សន្តិសុខ និងបង្កចលាចលក្នុងសង្គម។
គួរឲ្យដឹងថា កាលពីថ្ងៃទី ២៣ ខែឧសភាកន្លងទៅ ជនសង្ស័យខាងលើបានបង្ហោះព័ត៌មានមិនពិតមួយទៅក្នុងគេហទំព័ររបស់ខ្លួន ឈ្មោះ "ratstas" ជាភាសាថៃថា "នាយករដ្ឋមន្ត្រីថៃលោក Prayut Chan-o-cha បានប្រាប់ឲ្យពលរដ្ឋចាក់ទឹកជំនួសសាំង ខណៈពេលដែលសាំងឡើងថ្លៃខ្ពស់។" ផ្ទុយទៅវិញ ការលើកឡើងដូចនេះ ត្រូវបាននាយករដ្ឋមន្ត្រីថៃ ច្រានចោលទាំងស្រុង៕
នាយករដ្ឋមន្ត្រីថៃលោក Prayut Chan-o-cha
ប្រភព៖ Bangkokpost