សម្តេចតេជោ ហ៊ុន សែន បានចេញបញ្ជាទៅលោកអ៊ិត សំហេង រដ្ឋមន្ត្រីក្រសួងការងារនាឱកាសសម្តេចអញ្ជើញជួបសំណេះសំណាលជាមួយកម្មករ- កម្មការិនីប្រមាណ១៦,៤៧៤នាក់ មកពីរោងចក្រ សហគ្រាសចំនួន១០ មកពីតំបន់នានាស្ថិតក្នុងស្រុកស្អាង និងស្រុកកោះធំ ខេត្តកណ្តាល ។
សម្តេចនាយករដ្ឋមន្ត្រីបានថ្លែងថា ៖ «ថ្ងៃនេះយកការរម្លឹកបន្តិច ខ្ញុំបានផ្តល់ប្រាក់បុរេប្រទាន ឲ្យក្រសួងការងារ និងបណ្តុះបណ្តាលវិជ្ជាជីវៈ៤លាន ៦សែនដុល្លាររួចស្រេចទៅហើយ ដើម្បីដោះស្រាយកម្មករដែលរោងចក្រម្ចាស់រោងចក្ររត់ចោល ក៏ប៉ុន្តែនៅតំបន់ចាក់អង្រែ និងតំបន់ខ្លះក្បែរខាងយើងនេះនៅតែមានរឿងនេះ» ។ សម្តេចតេជោ ហ៊ុន សែន បានទាមទារការពន្យល់ដោយមានប្រសាសន៍បែបនេះថា ៖ «តើមកពីអ្វី0x017d7 ខ្ញុំសុំរបាយការណ៍ តើមកពីអ្វីបានជាអស់លោក មិនបញ្ចប់ ហើយទុកឲ្យក្មួយខ្លះចង់ទៅដាក់ញ្ញាតិនៅផ្ទះខ្ញុំ ក្មួយខ្លះបោះតង់ ។
តើរឿងនេះជារឿងអីពិតប្រាកដ ? សុំឲ្យខ្ញុំបានដឹងផងបានទេ អំពីបញ្ហានេះ ? ហើយតើយើងអាចបុរេប្រទានលុយចេញមកបន្ថែម ដើម្បីដោះបញ្ចប់រឿងនឹងបានទេ ?» សម្តេចបន្តថា អស់លោកត្រូវអនុវត្តតាមច្បាប់ កុំអនុវត្តតាមបទបញ្ជា ។
ប្រមុខដឹកនាំរាជរដ្ឋាភិបាលមានប្រសាសន៍ថា ៖ «ហេតុអ្វីបានជាខ្ញុំចង់ឲ្យពន្លត់ភ្លើងនឹងឲ្យវាឆាប់ចប់ បែរជាភ្លើងនឹងវានៅតែហុយផ្សែងមក ។ អញ្ចឹងរឿងនឹងត្រូវតែអស់លោកដោះស្រាយ ។ បើត្រូវការលុយបន្ថែម អត់អីទេ បញ្ជួនមកខ្ញុំ ខ្ញុំចារភ្លាម អស់លោកយកលុយទៅបើកទៅ កុំទុកអារឿងនឹងវាយូរពេក ។ អញ្ចឹងទេខ្ញុំសុំឲ្យឯកឧត្តម អ៊ិត សំហេង ដោះស្រាយឲ្យចប់នូវចំណុចប៉ុន្មាន ព្រោះវាឲ្យលុយទៅហើយ វានៅតែមិនព្រមចប់ ។ ហើយតិចទៀតច្បាស់ណាស់ថា បងប្អូនកូនក្មួយនឹងចង់ទៅដល់ផ្ទះខ្ញុំ ឬក៏អាចពេលណាមួយខ្ញុំមកតាខ្មៅ គាត់ស្ទាក់ឡានខ្ញុំ ដើម្បីឲ្យខ្ញុំដោះស្រាយ ។ អានឹងរឿងមកពីលោកឯង» ។ នាឱកាសនោះផងដែរ សម្តេចតេជោ បានជូនដំណឹងទៅបងប្អូនកម្មករ-កម្មការិនីឲ្យបានជ្រាបផងដែរថា ច្បាប់ទាក់ទងជាមួយនឹងផលប្រយោជន៍របស់កម្មករ ដែលមុននេះថៅកែតែងតែជំពាក់កម្មករនឹងត្រូវធ្វើវិសោតនកម្មក្នុងខែ៦នេះ ដើម្បីតម្រូវឲ្យថៅកែរោងចក្រត្រូវបើកលុយអត្ថប្រយោជន៍ជូនកម្មកររៀងរាល់ ៦ខែម្តង ។
សម្តេចក៏បានរម្លឹកថា កាលពីឆ្នាំ២០១២ សម្តេចបានបើកលុយឲ្យចំនួន១២លានដុល្លារអាមេរិក ដោះស្រាយជូនកម្មកររឿងប្រាក់អត្ថប្រយោជន៍ ព្រោះពេលនោះកម្មការិនីត្រូវទទួលបានប្រាក់អត្ថប្រយោជន៍ដល់ទៅជាង២ម៉ឺន ខ្លះ១ម៉ឺនដុល្លារ និងខ្លះទៀតក៏រាប់ពាន់ដុល្លារផងដែរ ដោយសារតែថៅកែរោងចក្រជំពាក់ ។
សម្តេចតេជោមានប្រសាសន៍បន្តថា៖ «បានន័យថា យើងបណ្តោយឲ្យថៅកែរោងចក្រ ជំពាក់កម្មករយូរពេក ដល់ទៅពេលដែលម្ចាស់រោងចក្រដួលរលំ ទម្ងន់ អម្រែកទាំងប៉ុន្មាន ធ្លាក់មកលើរាជរដ្ឋាភិបាលទាំងអស់ អញ្ចឹងទេនៅក្នុងខែ៦នេះ ច្បាប់នឹងត្រូវធ្វើវិសោតនកម្ម៦ខែម្តង បើកឲ្យកម្មករ» ៕