ធ្ងន់កហើយ! Facebook អាចនឹងត្រូវសងប្រាក់រាប់ពាន់លានដុល្លារ ជុំវិញកម្មវិធីស្កែនមុខ ដោយគ្មានការអនុញ្ញាតពីអ្នកប្រើប្រាស់!
18/04/2018
(វ៉ាស៊ីនតោន)៖ ក្រុមហ៊ុន Facebook អាចនឹងប្រឈមមុខបង់ប្រាក់សំណងរាប់ពាន់លានដុល្លារ ពាក់ព័ន្ធនឹងការប្រមូលទិន្នន័យរបស់ អ្នកប្រើប្រាស់តាមរយៈកម្មវិធីស្កែនមុខ ឬទទួលស្គាល់មុខដោយស្វ័យប្រវត្តិ ដែលជាកម្មវិធី Tag បន្តឱ្យមិត្តភក្តិនៅលើបណ្ដាញទំនាក់ទំនងសង្គមមួយនេះ នៅពេលមានការកំណត់ថា ពិតជារូបរបស់គណនីអ្នកប្រើប្រាស់ណាមួយ ដែលមាននៅក្នុងរូបនោះ។ នេះបើតាមសេចក្ដីរាយការណ៍ជាច្រើន ដកស្រង់ដោយទីភ្នាក់ងារសារព័ត៌មានចិន ស៊ីនហួរ នៅព្រឹកថ្ងៃពុធ ទី១៨ ខែមេសា ឆ្នាំ២០១៨។
យោងតាមចៅក្រម លោក ចាម ដូណាតូ (James Donato) ឲ្យដឹងថា ក្រុមហ៊ុន Facebook អាចនឹងត្រូវបានប្ដឹងដោយអ្នកប្រើប្រាស់បីនាក់នៅក្នុងរដ្ឋ អ៊ីលីណយស៍ (Illinois) ដែលអះអាងថា ក្រុមហ៊ុនបណ្ដាញទំនាក់ទំនងសង្គមមួយនេះ បានប្រមូលទិន្នន័យរបស់ពួកគេ តាមរយៈកម្មវិធីស្កែនមុខដោយគ្មានការអនុញ្ញាត ឬយល់ព្រមជាមុន។ «ពាក្យបណ្ដឹងរបស់ដើមបណ្ដឹងមានលក្ខណៈគ្រប់គ្រាន់ ដើម្បីទទួលបានការអនុញ្ញាតបន្តប្ដឹងទាមទារសំណង ក្នុងការដោះស្រាយជម្លោះ»។ នេះបើតាមសម្តីចៅក្រម លោក James Donato។
គួរបញ្ជាក់ថា បើតាមប្រព័ន្ធផ្សព្វផ្សាយអាមេរិក ដើមបណ្ដឹងទាំងអស់បានទាមទារប្រាក់សំណង ៥,០០០ដុល្លារ សម្រាប់រាល់ពេលរូបភាពរបស់ពួកគេម្នាក់ ត្រូវបានប្រើប្រាស់ដោយគ្មានការអនុញ្ញាត។ មួយវិញទៀត បើសិនជាបណ្ដឹងនេះទទួលបានជោគជ័យ នោះវា នឹងជំរុញឱ្យអ្នកប្រើប្រាស់ដទៃដែលជួបបញ្ហាដូចគ្នា ដាក់ពាក្យប្ដឹងទាមទារសំណងដែរ៕
