លោកមេក្រុមបច្ចេកទេសម្នាក់ កំពុងកសាងផ្លូវរថភ្លើងនៅក្នុងស្រុកទឹកផុស ខេត្តកំពង់ឆ្នាំង នៅព្រឹកថ្ងៃទី២ ខែមេសា ឆ្នាំ ២០១៨ នេះបានឱ្យដឹងថា ផ្លូវរថភ្លើងក្នុងពេលនេះ គឺកសាងដោយក្រុមហ៊ុនរ៉ូយ៉ាល់គ្រុប របស់លោកឧកញ៉ា គិត ម៉េង ដែលមកដល់ពេលនេះកំពុងកសាងនៅក្នុងទឹកដីខេត្តកំពង់ឆ្នាំង ជាងមួយខែមកហើយ។
ដោយឡែកសព្វថ្ងៃនេះ ក្រុមបច្ចេកទេសរបស់ក្រុមហ៊ុនមានចំនួន៨ក្រុម គឺ ៣ ក្រុមកំពុងកសាងផ្លូវរថភ្លើងនៅក្នុងដីខេត្តពោធិ៍សាត់ និង ៥ ក្រុមទៀតកំពុងកសាងនៅក្នុងទឹកដីខេត្តកំពង់ឆ្នាំង ដែលមានប្រវែងជាង ១០០ គីឡូម៉ែត្រ។ ចំពោះផែនការកសាងដែលក្រុមបច្ចេកទេសរបស់ក្រុមហ៊ុនបានទទួលកសាង គឺផ្លូវរថភ្លើងចាស់ដែលមានការរលុះបាក់ស្រុតត្រូវធ្វើការឈូសឆាយ និងចាក់ដីកិនបង្ហាប់ជាថ្មី។ ចំណែកដែកកំណល់ និងដែករៃចាស់ៗដែលច្រេះពុកខូចត្រូវគាស់ដកចេញ ដោយដាក់ដែកកំណល់ និងដែករៃថ្មី។ ចំណែកនៅចំណុចដែលមានស្ពានតម្រូវឱ្យដាក់ឈើផ្ចឹកជាឈើលេខមួយធ្វើជាកំណល់ ព្រោះឈើផ្ចឹកមានគុណភាពល្អ និងកំណល់ឈើនេះពេលរថភ្លើងបើកបរអាចមានរំញោច ធ្វើឱ្យស្ពានមានលំនឹងល្អមិនញ័ររំជួយ និងមិនធ្វើឱ្យស្ពានឆាប់ខូចខាត។
ទាក់ទងនឹងការកសាងផ្លូវរថភ្លើងឡើងវិញនេះ លោក ម៉េង ហាក់ អភិបាលស្រុកទឹកផុស នៅល្ងាចថ្ងៃទី០២ ខែមេសា ឆ្នាំ២០១៨ នេះបានឱ្យដឹងថា ការកសាងផ្លូវរថភ្លើងថ្មីនេះ ក៏មានផលប៉ះពាល់ជាមួយផ្ទះប្រជាពលរដ្ឋប្រមាណជាង ១០ គ្រួសារផងដែរ នៅចំណុចរ៉ារមាស ទីរួមស្រុកទឹកផុស ប៉ុន្តែរដ្ឋាភិបាលបានដោះស្រាយគោលនយោបាយឱ្យអោយប្រជាពលរដ្ឋរួចរាល់ហើយតាំងពីឆ្នាំ ២០១៥ មកម្ល៉េះ។
លោកអភិបាលស្រុកបានឱ្យដឹងទៀតថា តាមច្បាប់កំណត់ចំណីដីផ្លូវរថភ្លើងនៅក្នុងក្រុងត្រូវចេញពីអ័ក្សទៅ ៤ ម៉ែត្រ នៅក្នុងទីប្រជុំជនត្រូវចេញពីអ័ក្សផ្លូវទៅ ២០ ម៉ែត្រ និង នៅជនបទចេញពីអ័ក្សផ្លូវទៅ ៣០ ម៉ែត្រ។ ដោយឡែកតាមគោលការកំណត់របស់ថ្នាក់លើ តាមលោកដឹងគឺការកសាងផ្លូវរថភ្លើងនេះត្រូវកសាងឱ្យហើយនៅមុនការបោះឆ្នោតសកល ក្នុងខែកក្កដា ឆ្នាំ ២០១៨ នេះ។