ខេត្តព្រះសីហនុ ៖ ក្រុមការងារចម្រុះរបស់រដ្ឋបាលខេត្តព្រះសីហនុ ដែលទើបបង្កើតថ្មី នៅរសៀលថ្ងៃទី២៨ ខែមីនា ឆ្នាំ២០១៨នេះ បានចុះទៅធ្វើការត្រួតពិនិត្យការដ្ឋានសំណង់មួយកន្លែងស្ថិតក្នុងភូមិលេខ០៤ សង្កាត់លេខ០៤ ក្រុងព្រះសីហនុ ដែលបានធ្វើការសាងសង់ធ្វើខឿនថ្មសងខាងអូរ និងបោះបង្គោលថ្មចំកណ្តាលអូរ ក្នុងគោលបំណងវាតទីរំលោភយកដីអូរធ្វើជាកម្មសិទ្ធិផ្ទាល់ខ្លួនដោយគ្មានច្បាប់អនុញ្ញាត។
ក្រុមជាងសំណង់ ដែលកំពុងធ្វើការសាងសង់ចាក់ខឿនថ្មសងខាងអូរខាងលើនេះ បានប្រាប់ឲ្យដឹងថា ម្ចាស់ដីម្ចាស់សំណង់ខាងលើនេះមានឈ្មោះ កៅ ហុង ហើយអ្នកមើលការខុសត្រូវការដ្ឋាននេះមានឈ្មោះ ឈុន ហេង។ ពាក់ព័ន្ធការសាងសង់របងថ្មនៅសងខាងអូរ និងចាក់គ្រឹះបោះបង្គោលថ្មនៅចំកណ្តាលអូរខាងលើនេះ ក្រុមជាងសំណង់បានធ្វើការបញ្ជាក់យ៉ាងច្បាស់ថា គោលបំណងរបស់ម្ចាស់ដី គឺធ្វើគម្របចាក់បេតុងក្រាលពីលើអូរ ហើយគោលដៅចាក់បេតុងក្រាលពីរលើអូរបែបនេះមានប្រវែងមិនតិចជាង ៣០០ ម៉ែត្រនោះទេ គឺធ្វើព័ទ្ធជុំវិញដីតែម្តង។
លោក ជ្រា ថារ៉ាវុធ អនុប្រធានមន្ទីរសាធារណការខេត្តព្រះសីហនុ និងជាអនុប្រធានអចិន្ត្រយ៍ក្រុមការងារចុះត្រួតពិនិត្យបានបញ្ជាក់ប្រាប់ឲ្យដឹងថា សំណង់ខាងលើនេះមិនមានច្បាប់អនុញ្ញាតត្រឹមត្រូវទេ ហើយទំហំទទឹងដីអូរខាងលើនេះ បើតាមការចុះវាស់វែងជាក់ស្តែងរបស់មន្ត្រីជំនាញមានទំហំ ១៥ ម៉ែត្រ ៣តិក (វាស់តាមប្លង់ប្រព័ន្ធនៃទំហំអូរ) ប៉ុន្តែម្ចាស់សំណង់បានធ្វើការសាងសង់ចូលដីអូរប្រវែងជាង៦ម៉ែត្រ គឺទំហំអូរនៅសល់តែ ៨ម៉ែត្រ ៤តឹកប៉ុណ្ណោះ។ នៅចំពោះមុខការដ្ឋានសំណង់ខាងលើនេះ ត្រូវបានក្រុមការងារចម្រុះរបស់រដ្ឋបាលខេត្តសម្រេចឲ្យធ្វើការផ្អាកការសាងសង់ជាបណ្ដោះអាសន្ន និងតម្រូវឲ្យម្ចាស់ដីសុំច្បាប់អនុញ្ញាតឲ្យបានត្រឹមត្រូវរួចរាល់ទើបអាចធ្វើការសាងសង់បន្តបាន ប៉ុន្តែក្នុងករណីអនុវត្តផ្ទុយពីសេចក្តីណែនាំខាងលើ ដោយម្ចាស់សំណង់នៅតែបន្តធ្វើការសាងសង់រដ្ឋបាលខេត្ត នឹងមានវិធានការតាមផ្លូវច្បាប់មិនអាចគេចផុតនោះទេ។
ជុំវិញបញ្ហាសំណង់ល្មើសច្បាប់ខាងលើនេះ បើតាមក្រុមមន្ត្រីជំនាញសុរិយាដីដែលចុះពិនិត្យ និងវាស់វែងផ្ទាល់ ក៏បានធ្វើការបញ្ជាក់ផងដែរថា សំណង់ខឿនថ្មនៅសងខាងអូរ និងបង្គោលគ្រឹះដែលបានបោះនៅចំកណ្តាលដីអូរខាងលើនេះ គឺជាការរំលោភបំពានទាំងស្រុងទៅលើច្បាប់ភូមិបាលតែម្តង ពិព្រោះដីអូរ ដីចំណីផ្លូវសាធារណៈ ឬ បឹងបួ ជាដីសាធារណៈរបស់រដ្ឋ មិនអាចឲ្យបុគ្គល់ណាម្នាក់រំលោភយកធ្វើជាកម្មសិទ្ធិផ្ទាល់ខ្លួនបានទេ ហើយករណីនៅតែបំពានបុគ្គលនោះអាចប្រឈមនឹងផ្លូវច្បាប់ ជាប់ទោសទណ្ឌពីរ១ឆ្នាំទៅ៥ឆ្នាំ និងពិន័យជាប្រាក់ពី៥ លានរៀល ទៅ ៥០ លានរៀលផងដែរ នេះបើយោងតាមច្បាប់ភូមិបាល មាត្រទី២៥៩។
ដូចនេះជាផ្លូវច្បាប់ ម្ចាស់សំណង់ខាងលើនេះ ត្រូវតែវាយកម្ទេចចោល និងកាយចេញឲ្យអស់ពីដីអូរ ដោយរក្សាទំហំដីអូរឲ្យនៅសភាពដើមតាមប្លង់កម្មសិទ្ធិនៃដីអូរ ហើយចំពោះច្បាប់អនុញ្ញាតបើសិនជារដ្ឋបាលខេត្តសម្រេចឲ្យ ក៏មិនមែនឲ្យធ្វើដូចរូបភាពខាងលើនេះដែរ គឺអាចធ្វើបានត្រឹមចាក់គ្រឹះទប់ដីអូរនៅសងខាងអូរតែប៉ុណ្ណោះ គឺគ្មានហេតុផលណាអនុញ្ញាតឲ្យចាក់បេតុងក្រាលលើអូរសម្រាប់ប្រើប្រាស់ជាប្រយោជន៍បុគ្គលឯកជនបែបនេះនោះទេ។ សរុបសេចក្តីមក បញ្ហានេះម្ចាស់សំណង់គួរតែធ្វើការរុះរើចេញវិញឲ្យអស់ដោយខ្លួនឯង មុនពេលដែលរដ្ឋបាលខេត្តអនុវត្តច្បាប់ និងកុំស្រមៃថាប្រើប្រាស់វិធីឃុបឃិតគ្នាប្រព្រឹត្តិអំពើពុករលួយដូចពេលមុនៗឲ្យសោះ ពីព្រោះថ្នាក់ដឹកនាំខេត្តព្រះសីហនុ បច្ចុប្បន្នគឺធ្វើអ្វីតាមតែផ្លូវច្បាបតែប៉ុណ្ណោះ។
គួរបញ្ជាក់ផងដែរថា ថ្មីៗនេះក្រោយពីមានបញ្ហាទឹកភ្លៀងជន់លិចទីក្រុងរួចមក នៅថ្ងៃទី២៦ ខែមីនា ឆ្នាំ២០១៨ រដ្ឋបាលខេត្តព្រះសីហនុបានសម្រេចបង្កើតក្រុមការងារចុះត្រួតពិនិត្យ គ្រប់គ្រងប្រព័ន្ធលូបង្ហូរទឹក អូរ ប្រឡាយ ត្រពាំង និងប្រព័ន្ធប្រតិកម្មទឹកកខ្វក់ក្នុងក្រុងព្រះសីហនុ។ ដោយកិច្ចការនេះលោក ជាវ វិជ្ជាក់ អភិបាលរងខេត្តព្រះសីហនុ ជាប្រធានក្រុមការងារ និងមន្ត្រីជំនាញពាក់ព័ន្ធ មន្ទីរអង្គភាពចំនួន ១៨ ទូទាំងខេត្ត.ក្រុង ស្រុក និង ចៅសង្កាត់ មេឃុំ ទូទាំងខេត្តចំនួន ២៩ ផងដែរ។ដោយក្រុមការងារដែលទើបបង្កើតថ្មីនេះ រដ្ឋបាលខេត្តមានគោលបំណងធ្វើយ៉ាងណាបំបាត់ឲ្យបានទាំងស្រុង នូវវប្បធម៌ឃុបឃិតគ្នារំលោភយកដីសាធារណៈ ដីអូរ ប្រព័ន្ធលូ ត្រពាំង បឹងបួ រួមនឹងគ្រប់គ្រងប្រតិកម្មទឹកកខ្វក់ បំពុលបរិស្ថានជាដើម ក្នុងគោលដៅអនុវត្តតាមផ្លូវច្បាប់។