ភ្នំពេញ៖ ស្ត្រីម្នាក់រួមជាមួយកូនតូចម្នាក់ រត់យំត្រហេបត្រហបទៅប្តឹងនគរបាលប៉ុស្តិ៍បាក់ខែង ខណ្ឌជ្រោយចង្វារ បន្ទាប់ពីចាញ់ល្បិចក្រុមទម្លាក់យោងល្បួងនាំជិះរថយន្តទំនើប ហើយធ្វើសកម្មភាពដោះដូរបានមកវិញនូវគ្រាប់សំណមួយកូនថង់ទុកគ្រាន់បង្អួតប្តី។
ហេតុការណ៍នេះ បានកើតកាលពីវេលាម៉ោង ៨ និង ៣០ នាទីព្រឹក ថ្ងៃទី២០ ខែមីនា ឆ្នាំ២០១៨ ស្ថិតនៅក្នុងចំការចេក ភូមិព្រែកតាប៉ែន ឃុំព្រែកអញ្ចាញ ស្រុកមុខកំពូល ខេត្តកណ្តាល ជាប់ព្រំប្រទល់ជាមួយ ភូមិបាក់ខែង សង្កាត់បាក់ខែង ខណ្ឌជ្រោយចង្វារ។ ក្រោយពីសាកសួររឿងហេតុកើតឡើងនៅក្នុងទឹកដីស្រុកមុខកំពូល ទើបនគរបាលប្រាប់ឲ្យទៅដាក់ពាក្យបណ្តឹងនៅខាងស្រុកមុខកំពូលវិញ។
ស្ត្រីរងគ្រោះឈ្មោះ លី ឆយី អាយុ២៥ឆ្នាំ មុខរបរមេផ្ទះ មានកូនស្រីម្នាក់អាយុ ២ ខួប រស់នៅក្នុងភូមិព្រែកថ្មី ឃុំព្រែកអញ្ចាញ ស្រុកមុខកំពូល ខេត្តកណ្តាល។ ចំណែកសម្ភារៈបាត់បង់មាន ខ្សែកមាសទម្ងន់៥ជី ខ្សែដៃមាសទម្ងន់៥ជី ចិញ្ចៀន២វង់ (ស្មើ៤ជីមាស) លុយ ១០០ ដុល្លារ និងទូរស័ព្ទដៃម៉ាក OPPO មួយគ្រឿង ដែលទើបនឹងទិញយកមកទុកលេងហ្វេសប៊ុកបាន ៣ ថ្ងៃ។
តាមការរៀបរាប់ពីស្ត្រីរងគ្រោះបានឲ្យដឹងថា មុនកើតហេតុខ្លួននិងកូនស្រីបានមកផ្សារព្រែកអញ្ចាញ ស្ថិតនៅក្នុងភូមិព្រែកអញ្ចាញក្រោម ឃុំព្រែកអញ្ចាញ ដើម្បីរកទិញម្ហូប ខណៈដែលដើរចូលផ្សារទិញម្ហូបរួចហើយ ក៏បានពរកូនស្រីចេញពីផ្សារវិញបានបន្តិចមានស្ត្រីម្នាក់ដើរមកសួរ «មានឃើញកាបូបមួយអត់ មានគេជ្រុះបាត់ ក្នុងនោះមានមាស និងលុយច្រើន» ទោះជាឆ្លើយថា មិនដឹង មិនឃើញ ក៏ត្រូវបានស្ត្រីម្នាក់ដើរមកក្បែរហើយពោលថា កុំមាត់មានបុរសម្នាក់គេរើសបាន ហាមប្រាប់អ្នកណាឲ្យដឹង ចាំយកទៅចែកគ្នា លុះពេលគេលាស្រាយមើលក្នុងនោះមានគ្រឿងលោហធាតុក្រហម និង លុយដុល្លារពេញកាបូប រួចនាំនាងដើរចេញមកក្រៅបបួលនាំឡើងជិះតាមរថយន្តហ្វតមួយគ្រឿង ដោយពីរនាក់ម្តាយកូនជិះបាំងខាងក្រោយជាមួយស្ត្រីសង្ស័យ ២ នាក់ នាំគ្នាធ្វើដំណើរតាមបណ្តោយផ្លូវជាតិលេខ៦ ពីកើតទៅលិច ជិះបណ្តើរលាមាត់ថង់ឲ្យមើលបណ្តើរ ភ្លេចខ្លួនហុចថង់មួយឲ្យនាងកាន់ រួចដោះយកគ្រឿងអលង្ការទ្រព្យសម្បត្តិអស់ពីខ្លួន។
ស្ត្រីរងគ្រោះបានបន្តឱ្យដឹងថា លុះដល់ចំណុចភូមិព្រែកតាប៉ែន ឃុំព្រែកអញ្ចាញ បត់ចូលក្នុងព្រៃចំការចេកមួយកន្លែងក្បែរស្ពានលេខទី១២ ផ្លូវលេខ៦ ទើបឲ្យចុះដោយប្រាប់ថា រង់ចាំនៅទីនេះរួមជាមួយស្ត្រីម្នាក់ ហើយជនសង្ស័យប្រុស ៣ នាក់ ស្រីម្នាក់ បានជិះរថយន្តចេញទៅបាត់ ដោយប្រាប់ថាកុំឲ្យខ្ចរខ្ចាយយកមាសទៅដូរទុកចែកគ្នា។ ចេញបាត់អស់មួយសន្ទុះទើបស្ត្រីជនសង្ស័យម្នាក់ទៀតចេញទៅដែរ ដោយប្រាប់ថាទៅតាមមើលដូរលុយមាសអ្វីក៏យូរម្ល៉េះ? បែរជាទៅបាត់រហូតយូរពេកហេតុអ្វីមិនឃើញពួកគេមកវិញសោះ គ្រាន់តែលាស្រាយមាត់ថង់មើល ពុទ្ធោ…! ខាងក្នុងសុទ្ធតែគ្រាប់សំណ ទើបដឹងថាចាញ់បោកគេ ហើយដើរចេញមកក្រៅហៅម៉ូតូឌុបជិះទៅប្តឹងនៅប៉ុស្តិ៍បាក់ខែង។
រឿងរ៉ាវនេះ ក្រោយពីសមត្ថកិច្ចសាកសួរទៅមិនមែនកើតនៅក្នុងភូមិសាស្ត្រសង្កាត់បាក់ខែង គ្រាន់តែព្រំប្រទល់ជាប់គ្នា ទើបនគរបាលប្រាប់ឲ្យជនរងគ្រោះទៅដាក់ពាក្យបណ្តឹងនៅប៉ុស្តិ៍ព្រែកអញ្ចាញ ស្រុកមុខកំពូលវិញ។