ចចាមអារ៉ាមកន្លងមកបានចេញផ្សាយថា Nokia 7 Plus និង Nokia 1 នឹងបង្ហាញនៅក្នុងឆ្នាំ ២០១៨ នេះ។ ត្បិតថាក្រុមហ៊ុន HMD Global មិនបានបញ្ជាក់ពីវត្តមានរបស់ទូរសព្ទទាំងពីរ ប៉ុន្តែពេលនេះគណនី Twitter ឈ្មោះ Evan Blass បានបង្ហាញរូបភាពស្រស់ៗរបស់ Nokia 7 Plus និង Nokia 1។
រូបភាពបានបង្ហាញថា Nokia 7 Plus ទំនងជាស្មាតហ្វូនម៉ាក Nokia ដំបូងគេដែលមានប្រើអេក្រង់មាត្រដ្ឋាន 18:9 ហើយមានស៊ុមអេក្រង់ស្ដើង។ ការចុះផ្សាយកន្លងមកឲ្យដឹងអេក្រង់នេះមានទំហំ ៦ អ៊ីញ ហើយវាមានបំពាក់បន្ទះឈីប Snapdragon 660, RAM ទំហំ ៤ GB, អង្គផ្ទុកទិន្នន័យទំហំ ៦៤ GB និងមានរន្ធដោតកាស 3.5 mm ផងដែរ។
នៅផ្នែកខាងក្រោម Nokia 7 Plus មានប្រព័ន្ធកាមេរ៉ាភ្លោះ, ទ្រនាប់ស្កេនម្រាមដៃ និងមានជាឡូហ្គោ Android One ផងដែរ នេះមានន័យថាវានឹងដំណើរការដោយប្រព័ន្ធប្រតិបត្តិការ Android ដែលអាចទទួលបានការអាប់ដេតឡើងទៅជំនាន់ថ្មីរយៈពេល ២ ឆ្នាំ។
Nokia 1
ចំពោះ Nokia 1 វិញជាស្មាតហ្វូនលំដាប់ក្រោម ដែលទំនងជាមាន RAM ទំហំ ១ GB និងអង្គផ្ទុកទិន្នន័យ ៨ GB។ Nokia 1 អាចនឹងដំណើរការដោយប្រព័ន្ធប្រតិបត្តិការ Android Go ជាប្រព័ន្ធប្រតិបត្តិការដែលផលិតជាពិសេសសម្រាប់ទូរសព្ទលំដាប់មធ្យម។
ទាំង Nokia 7 Plus និង Nokia 1 រំពឹងថានឹងបង្ហាញខ្លួនក្នុងព្រឹត្តិការណ៍ MWC ឆ្នាំ ២០១៨ នាចុងខែកុម្ភៈនេះ៕
ប្រភព៖
PhoneArena ប្រែសម្រួល៖ ឡៃហ៊ាង
