(កៀវ)៖ សហរដ្ឋអាមេរិកបានផ្គត់ផ្គង់ដល់អ៊ុយក្រែន នូវឧបករណ៍សម្រាប់មើលពេលយប់ (Night Vision) ប្រមាណ ២,៥០០គ្រឿង ក្រោមក្របខណ្ឌនៃជំនួយផ្នែកសន្តិសុខ ៨៥០លានដុល្លារ ដែលទីក្រុងវ៉ាស៊ីនតោនបានផ្តល់ឲ្យរដ្ឋាភិបាលទីក្រុងកៀវ ចាប់តាំងតែពីឆ្នាំ២០១៤មក។ នេះបើតាមការចេញផ្សាយដោយសារព័ត៌មានរុស្ស៊ី Sputnik នៅព្រឹកថ្ងៃព្រហស្បតិ៍ ទី១៥ ខែកុម្ភៈ ឆ្នាំ២០១៨។
ស្ថានទូតអាមេរិកប្រចាំនៅអ៊ុយក្រែន បានប្រកាសនៅលើបណ្តាញ Twitter នាថ្ងៃពុធសប្តាហ៍នេះថា «ថ្ងៃនេះឧបករណ៍ Night Vision ចំនួន ២,៥០០គ្រឿងផ្សេងទៀត ត្រូវបានបញ្ជូនទៅឲ្យដៃគូរបស់យើង នៅឯក្នុងជួរកងកម្លាំងប្រដាប់អាវុធអ៊ុយក្រែន ដោយបរិក្ខាយោធាទាំងនេះ នឹងជួយកងទ័ពអ៊ុយក្រែន អាចបន្តប្រុងជើងការដោយប្រសិទ្ធភាពជាប់ជានិច្ច និងការពារសន្តិសុខជូនប្រជាពលរដ្ឋអ៊ុយក្រែន»។
ឯកអគ្គរដ្ឋទូតអាមេរិកនៅអ៊ុយក្រែន លោកស្រី ម៉ារៀន យ៉ូវ៉ាណូវិច (Marie Yovanovitch) ដែលចូលរួមក្នុងពិធីប្រគប់ឧបករណ៍ខាងលើបាននិយាយថា ពួកឧទ្ទាម ដែលបង្កការគំរាមកំហែងដល់អធិបតេយ្យភាព នៃប្រទេសអ៊ុយក្រែន មិនអាចលាក់ខ្លួននៅក្រោមស្រមោលនៃពេលរាត្រីទៀតឡើយ។
គួរជម្រាបថា កាលពីខែមេសា ឆ្នាំ២០១៤ រដ្ឋាភិបាលទីក្រុងកៀវ បានបើកប្រតិបត្តិការយោធាប្រឆាំងនឹងតំបន់ Donbass ដែលបានបដិសេធមិនទទួលស្គាល់រដ្ឋាភិបាលថ្មីរបស់អ៊ុយក្រែន ដែលបានឡើងក្តោបក្តាប់អំណាច តាមរយៈទង្វើដែលប្រជាជននៅតំបន់នេះ ចាត់ទុកថាជាការធ្វើរដ្ឋប្រហារ៕
