ខេត្តបន្ទាយមានជ័យ ៖ ករណីមង្គលការមួយសុំជួលថែមម៉ោងមិនបាន ហើយក្រុមជនសង្ស័យលើកគ្នាដេញព្រួតវាយក្រុមតន្ត្រីសម័យ បណ្តាលឲ្យរបួស និងបង្ករភ្ញាក់ផ្អើលនៅលើដងផ្លូវលំ ក្នុងភូមិដុងអារញ្ញា សង្កាត់និមិត្ត ក្រុងប៉ោយប៉ែត កាលពីរសៀល ថ្ងៃទី២៦ ខែមករា ឆ្នាំ២០១៨ បានបញ្ចប់ក្រៅប្រព័ន្ធច្បាប់ ហើយគឺឱពុកម្តាយកូនកំលោះយកប្រាក់បង់ឲ្យគ្រួសាររងគ្រោះ៥លាន៥០ម៉ឺនរៀល ។
គ្រួសាររងគ្រោះឈ្មោះ ម៉ៃ ចាន់ថា ភេទប្រុស អាយុ៣៨ឆ្នាំ ជាម្ចាស់ក្រុមតន្ត្រីសម័យ ម៉ៃ ចាន់ថា និងមានទីលំនៅភូមិអណ្តូងថ្មមាស សង្កាត់ផ្សារកណ្តាល ក្រុងប៉ោយប៉ែត ប្រាប់តាមទូរស័ព្ទថា ករណីខាងលើត្រូវបានបញ្ចប់ ហើយកាលពីរសៀលថ្ងៃទី២៨ ខែមករា ម្សិលមិញ គឺឱពុកម្តាយកូនកំលោះ នៃពិធីមង្គលការនោះ ចេញមុខយកប្រាក់៥លាន៥០ម៉ឺនរៀលបង់ឲ្យ ។
គ្រួសាររងគ្រោះបន្តថា ការបញ្ចប់បញ្ហានេះ ក្រុមជនបង្កគ្មានអ្នកហ៊ានចេញមុខម្នាក់ឡើយ គឺឃើញតែឱពុកម្តាយរបស់កូនកំលោះតែប៉ុណ្ណោះ ។ ដោយឡែក លោក ម៉ា រិន នាយប៉ុស្តិ៍នគរបាលរដ្ឋបាលសង្កាត់និមិត្ត ប្រាប់តាមទូរស័ព្ទ នៅព្រឹកថ្ងៃទី២៩ ខែមករា នេះថា ករណីខាងលើ ពិតជាត្រូវភាគីទាំង២សម្រួលគ្នាបញ្ចប់មែន ។
លោកនាយប៉ុស្តិ៍បន្តថា ថ្ងៃកើតហេតុនោះ ក្រៅពីមនុស្សមួយក្រុមក៏មានកូនកំលោះផងដែរ ជាជនសង្ស័យ ដែលស្ថិតក្នុងហេតុការណ៍ដេញវាយក្រុមជនរងគ្រោះ ។ លោកថា ក្រុមជនបង្កមិនបានចូលខ្លួនបំភ្លឺសូម្បីតែម្នាក់ មិនតែប៉ុណ្ណោះដំបូងខណៈលោកឲ្យកម្លាំងក្រោមឱវាទទៅអញ្ជើញអ្នកពាក់ព័ន្ធដើម្បីសួរនាំ បែរជាក្រុមគ្រួសារម្ចាស់ដើមការស្តីឲ្យសមត្ថកិច្ចថែមទៀត ថាហេតុការណ៍ខាងលើផុតពីផ្ទះគេហើយ គេមិនដឹងទេ ហើយសួរសមត្ថកិច្ចថា ស្រាវជ្រៀវច្បាស់ហើយឬនៅ?
ទីបំផុតក្រុមបង្កមិនហ៊ានចេញមុខជួបសមត្ថកិច្ចសូម្បីតែម្នាក់ គឺឲ្យឱពុកម្តាយកូនកំលោះចេញមុខដោះស្រាយបញ្ចប់រឿងត្រឹមទឹកប្រាក់៥លាន៥០ម៉ឺនរៀល ។
គួរបញ្ជាក់ថា ករណីខាងលើកើតឡើងកាលពីថ្ងៃទី២៦ ខែមករា ឆ្នាំ២០១៨ ដោយក្រុមតន្ត្រីសម័យ ម៉ៃ ចាន់ថា មួយក្រុមគ្នា៥នាក់ ត្រូវគ្រួសារមួយជួលទៅលេងនៅក្នុងភូមិកើតហេតុខាងលើ ប៉ុន្តែកំណត់ត្រឹមម៉ោង០៣រសៀល ។ ក្រុមជនរងគ្រោះអះអាងថា ដោយសារជាប់លេងឲ្យគេមួយកន្លែងទៀត នៅទីប្រជុំជនក្រុងប៉ោយប៉ែត មិនអាចតម្រូវតាមចិត្តម្ចាស់កម្មវិធីបាន ក៏ថែមត្រឹមតែ២ទៅ៣បទ ដឹងអីមានអ្នកចង់រករឿងនាំគ្នាឡើងលោតរហូតបាក់ឆាក ហើយតាមវាយពួកគេរបួសក្រោយបើករថយន្តចេញពីរោងការនៅមិនទាន់បាន២០០ម៉ែត្រផង មិនត្រឹមតែរបួសតែមនុស្សទេ ថែមទាំងខូចខាតរថយន្តបែកកញ្ចក់មុខ និងកញ្ចក់មើលក្រោយផងដែរ ។ ករណីនេះភាគីជនសង្ស័យមិនអាចទាក់ទងសុំការបំភ្លឺបានទេ ព្រោះមិនស្គាល់លេខទូរស័ព្ទ ៕