ខេត្តសៀមរាប ៖ គ្រូបង្រៀននៅស្រុកពួកម្នាក់ ត្រូវបានរថយន្ត២៥កៅអីដឹកភ្ញៀវទេសចរណ៍បុកពេញទំហឹង ចំពីមុខ បណ្តាលឱ្យស្លាប់នៅហ្នឹងកន្លែង ខណៈរថយន្តនោះបានឡើងវ៉ារថយន្តផ្សេងទៀតក្នុងទិសដៅ បញ្ច្រាសគ្នានៅលើដងផ្លូវជាតិលខេ៦ ពីកើតមកលិចបង្កឱ្យមានការកកស្ទះចរាចរណ៍ រួច ចុះរត់គេចខ្លួនបាត់បន្សល់ទុករថយន្តនៅកន្លែងកើតហេតុ។ ហេតុការគ្រោះថ្នាក់ចរាចរណ៍នោះ បានកើតឡើងនៅវេលាម៉ោ៤ និង១០នាទីរសៀល ថ្ងៃសៅរ៍១១កើត ខែមាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២៧ ខែមករា ឆ្នាំ២០១៨ ស្ថិតនៅលើដងផ្លូវជាតិលេខ៦ មុខតំបាញសូត្រព្រៃក្មេង ក្នុងភូមិព្រៃក្មេង ឃុំខ្នាត ស្រុកពួក ខេត្តសៀមរាប។
បើតាមលោកវរសេនីយ៍ឯក ទេព ពុំសែន អធិការស្រុកពួកបានប្រាប់តាមទូរស័ព្ទ នៅរសៀលថ្ងៃទី២៨ ខែមករា ឆ្នាំ២០១៨នេះថា ដោយមានប្រជាការពារភូមិ បានរាយការណ៍មកសមត្ថកិច្ចមូលដ្ឋាន រួចរាយការណ៍បន្តមកកម្លាំងជំនាញ របស់អធិការដ្ឋាននគរបាលស្រុក ថាមានករណីរគ្រោះថ្នាក់ចរាចរណ៍រវាង រថយន្តទេសចរណ៍២៥កៅអី មិនស្គាល់អត្តសញ្ញាណបានបើកបរពីទិសខាងកើតទៅលិចបុកជាមួយម៉ូតូដែលបើកច្រាសទិសគ្នា បណ្តាលឱ្យស្លាប់ ទើបលោកបានឱ្យកម្លាំងជំនាញចុះទៅដល់កន្លែងកើតហេតុ រួចយករថយន្ត និងម៉ូតូចេញពីកន្លែងកើតហេតុ ដើម្បីកុំឱ្យកកស្ទះចរាចរណ៍។ លោកបានបន្តថា ជនរងគ្រោះឈ្មោះ ហល់ ហឿន ភេទប្រុស អាយុ៥៣ឆ្នាំ មុខរបរគ្រូបង្រៀន រស់នៅភូមិសំរោងយារ ឃុំសំរោងយារ ស្រុកពួក ខេត្តសៀមរាប ជិះម៉ូតូម៉ាកហុងដា ស៊េរីឆ្នាំ២០០៧ ពណ៌ខ្មៅ ពាក់ស្លាកលេខ សៀមរាប ១D-០៥៨៣ បើកមកពីលិចមកកើត។ ចំណែកអ្នកបង្កបានចុះរត់គេចខ្លួនបាត់ បន្សល់ទុករថយន្តម៉ាកហាយ យ៉ាន់ដាយពណ៌ស លាយខៀវ ប្រភេទទេសចរណ៍ ពាក់ស្លាកលេខ សៀមរាប ៣A-១១៣១ បើកបររថយន្ត មកពីកើតទៅលិច ក្នុងទិសដៅបញ្ច្រាសគ្នា។
មូលហេតុ បង្កមកពីរថយន្តទេសចរណ៍២៥ កៅអីដឹកភ្ញៀវ មកដល់ចំណុចកើតហេតុ នៅលើដងផ្លូវជាតិលេខ៦ មុខតំបាញសូត្រព្រៃក្មេង ទឹកដី ភូមិព្រៃក្មេង ឃុំខ្នាត ស្រុកពួក ហើយឡើងវ៉ារថយន្តមួយគ្រឿងផ្សេងទៀត ហើយទាញចង្កូតមកវិញមិនទាន់ក៏ជ្រុលទៅបុកនឹងម៉ូតូជនរងគ្រោះបណ្តាលឱ្យស្លាប់ភ្លាមៗនៅហ្នឹងកន្លែង ក្នុងទិសខាងបញ្ច្រាសទិសគ្នាពីកើតមកលិច ហើយរថយន្តមិនស្គាល់អត្តសញ្ញាណ ក៏បើករត់គេចខ្លួនបាត់តែម្តង។ ក្រោយកើតហេតុកម្លាំងនគរបាលជំនាញបានចុះទៅវាស់វែង រួចយកវត្ថុតាងទាំងពីរមករក្សាទុកនៅអធិការដ្ឋាននគបាលស្រុក។ ចំណែកឯសាកសពជនរងគ្រោះ ត្រូវបានកម្លាំងយើងធ្វើការប្រគល់ឱ្យក្រុមគ្រួសារយកទៅធ្វើបុណ្យទៅតាប្រពៃណីនៅ ភូមិឃុំ ខាងលើ។