ខេត្តសៀមរាប ៖ បុរសម្នាក់ ស្រវឹងស្រារ៉ាំរ៉ៃ តូចចិត្តយកកន្សែងមួយហើយដើរទៅក្រោមដើមស្វាយចង.កសម្លាប់ខ្លួនកម្ពស់២ម៉ែត្រ បង្កឱ្យមានការភ្ញាក់ផ្អើលកាលពីវេលាម៉ោង០៦និង០០នាទីព្រឹកថ្ងៃទី២៤ ខែមករានេះ ស្ថិតនៅចំណុច ក្រុមទី០៤ ភូមិស្វាយព្រៃ សង្កាត់ស្វាយដង្គំ ក្រុងសៀមរាប ខេត្តសៀមរាប ។
សពជនរងគ្រោះខាងលើឈ្មោះ សេក សោម ហៅពេជ្រ អាយុ៣៨ឆ្នាំ មុខរបរគ្មាន ទីលំបច្ចុប្បន្នក្រុមទី០៤ ភូមិគោកក្រសាំង សង្កាត់ស្វាយដង្គំ ក្រុង-ខេត្តសៀមរាប ។
បើតាមប្រភពពីសមត្ថកិច្ចមូលដ្ឋានបានប្រាប់ថា ដោយមានព័ត៌មានពីប្រជាពលរដ្ឋមានករណី ធ្វើអត្តឃាតជាមួយកន្សែងពណ៌ក្រហមចង.កទៅនឹងដើមស្វាយមានកម្ពស់២ម៉ែត្រ ក្នុងភូមិស្វាយព្រៃ សង្កាត់ស្វាយដង្គំ ក្រុងសៀមរាប បន្ទាប់មកកម្លាំងជំនាញបានចុះទៅដល់កន្លែងកើតហេតុ រួចក៏បានសហការជាមួយអាជ្ញាធរមូលដ្ឋាន និងសមត្ថកិច្ចជំនាញបានយកកាំបិតមកកាត់កន្សែងទម្លាក់មកដី ដើម្បីធ្វើកោសល្យវិច្ច័យទៅលើដងខ្លួនសាកសព ។
តាមការពិនិត្យរបស់សមត្ថកិច្ចបច្ចេកទេសទៅលើដងខ្លួនសពជនរងគ្រោះពុំមានឃើញស្លាកស្នាមអ្វីដែលពាក់ពន្ធ និងបទល្មើសព្រហ្មទណ្ឌឡើយ ហើយកម្លាំងជំនាញបានសន្និដ្ឋានថា ជនរងគ្រោះពិតជាចង.កសម្លាប់ខ្លួនឯងពិតប្រាកដមែន ។ សេចក្តីរាយការណ៍បន្តថា មូលហេតុនោះដោយសារតែញៀនស្រារ៉ាំរៃ ។
បច្ចុប្បន្នសាកសពជនរងគ្រោះ ត្រូវបានសមត្ថកិច្ចធ្វើការប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ៕
