បុរសអ្នកបើករថយន្តមានឈ្មោះ ណាំ ណេង ភេទប្រុស អាយុ ២១ឆ្នាំ មុខរបរបើកបរស្នាក់នៅសង្កាត់ទំនប់ទឹក ខណ្ឌចំការមនបានប្រាប់ថា មុនកើតហេតុ គាត់បើករថយន្តគោលបំណងទៅដឹកសម្ភារៈនៅកោះពេជ្រ ហើយមកដល់ផ្លូវបើកថ្មីក្នុងទិសដៅពីកើតមកលិច ស្រាប់តែមានម៉ូតូកូនទាបើកបរដោយស្ត្រីម្នាក់តាមផ្លូវរដ្ឋសភា ក្នុងទិសដៅពីជើងមកត្បូង បុករថយន្តចំទ្វាខាងឆ្វេង និងបណ្ដាលឱ្យម៉ូតូគៀបជាប់ក្រោមរថយន្ត រួចត្រូវប្រជាពលរដ្ឋឃាត់រថយន្តនិងរូបគាត់ប្រគល់ឱ្យសមត្ថកិច្ចតែម្ដង ។សមត្ថកិច្ចផ្នែកវាស់វែងខណ្ឌបានប្រាប់ថា ដោយមានគ្រោះថ្នាក់ចរាចរណ៍ថវាងរថយន្តបុកម៉ូតូកូនទាបើកបរស្ត្រីម្នាក់ អាយុជាង ៤០ឆ្នាំ ហើយបណ្ដាលឱ្យរបួសរយះលើផ្ទៃមុខ ដោយសារអូសនិងថ្នល់កៅស៊ូ ។ក្រោយកើតហេតុ អ្នកបើករថយន្តត្រូវប្រជាពលរដ្ឋឃាត់ជាប់នៅកន្លែងកើតហេតុ និងហៅរថយន្តសង្គ្រោះមកយកជនរងគ្រោះ តែដោយរថយន្តសង្គ្រោះយូរពេក បុរសម្នាក់តំណាងឱ្យខាងរថយន្តបង្ក បានហៅម៉ូតូកង់បីដឹកយកទៅមន្ទីរពេទ្យឯកជន ក្បែរកន្លែងកើតហេតុ ដើម្បីសង្គ្រោះជាបឋមសិន ក្រោយមកក៏ទំនាក់ទំនងខាងក្រុមគ្រួសារស្ត្រីរងគ្រោះបានមកដល់ពេទ្យ ក៏ភាគីទាំងសងខាងសុំ ដោះស្រាយគ្នា នៅមន្ទីរពេទ្យដោយមិនបាច់សមត្ថកិច្ចវាស់វែងនោះទេ ៕អត្ថបទ ទេព វណ្ណះ
