បើតាម លោកស្រី មូរ សុខហួរអនុប្រធាន អតីតគណបក្សសង្រ្គោះជាតិ នៅក្នុងជំនួបនេះ គឺមានចំណុចសំខាន់ចំនួន៣ ត្រូវបានលើកមកពិភាក្សា ដែលជាការវិវដ្តថ្មីចុងក្រោយនៃការតស៊ូមតិរបស់ក្រុមតំណាងរាស្ត្រអតីតគណបក្សប្រឆាំងដ៍ធំជាងគេនៅកម្ពុជានេះ ក្នុងការរកអន្តរាគមន៍ពីសហរដ្ឋអាមេរិក។
ចំណុចសំខាន់ៗចំនួន៣ដែលត្រូវបានលើកយកមកពិភាក្សាបន្តនោះគឺ៖ ទី១ការបង្កកទ្រព្យសម្បត្តិរបស់អ្នកកាន់អំណាចដែលបានធ្វើអោយប៉ះពាល់ធ្ងន់ធ្ងរទៅលើលទ្ធិប្រជាធិបតេយ្យអំពើពុករលួយ និងការរំលាភសិទ្ធិមនុស្សនៅកម្ពុជា។
ទី២ គឺការមិនផ្តល់ទិដ្ឋាការដល់ជនទាំងនោះឲ្យចូលទៅក្នុងទឹកដីសហរដ្ឋអាមេរិក។ ចំណុចចុងក្រោយគឺជំហររបស់សហរដ្ឋអាមេរិកដែលនៅតែទាមទារឲ្យដោះលែងលោក កឹម សុខា និងជំរុញការបោះឆ្នោត ដោយសេរី និងយុត្តិធម៌ នៅកម្ពុជា ក្នុងឆ្នាំនេះ។
នេះបើតាមទំព័រហ្វេសប៊ុករបស់ លោកស្រី មូរ សុខហួរ។ គួរកត់សម្គាល់ថា ការពិភាក្សារវាងលោក Ed Royce និងមន្ដ្រីជាន់ខ្ពស់អតីតគណបក្សប្រឆាំង គឺជាការវិវដ្តថ្មីចុងក្រោយ បន្ទាប់ពីក្រុមមន្រ្តីនៃអតីតគណបក្សនេះ ស្វះស្វែងរកអន្តរាគមន៍ពីសភាអាមេរិកឲ្យដាក់ទណ្ឌកម្មលើរដ្ឋាភិបាលកម្ពុជា ក្រោយពីការរំលាយគណបក្សសង្រ្គោះជាតិ។
កាលណោះសមាជិកសភាអាមេរិក តម្រូវឲ្យក្រុមមន្រ្តីអតីតគណបក្សសង្រ្គោះជាតិ ជួយរៀបចំបញ្ជីឈ្មោះជនទាំងឡាយដែលគេចាត់ទុកថា ជាអ្នកពាក់ព័ន្ធនឹងការរំលាយគណបក្សប្រឆាំង ការរំលោភសិទ្ធិមនុស្ស និងការប្រព្រឹត្តអំពើពុករលួយ ដើម្បីឈានទៅបង្កកទ្រព្យសម្បត្តិរបស់ពួកគេ និងហាមមិនឲ្យជាន់ទឹកដីអាមេរិក។
កាលពីពាក់កណ្តាលខែមុន នៅក្នុងការសួរដេញដោលមួយ ដែលដឹកនាំដោយសមាជិកសភាម្នាក់គឺលោក Ted Yoho នៃគណបក្សសាធារណៈរដ្ឋ ក៏បានពិភាក្សានិងពិនិត្យមើលទណ្ឌកម្មធ្ងន់ធ្ងរថែមទៀតចំពោះរដ្ឋាភិបាលកម្ពុជា ដោយគិតគូរដល់ការប្រមូលបញ្ជីឈ្មោះបុគ្គល បញ្ជីឈ្មោះក្រុមហ៊ុន ដើម្បីបង្កកទ្រព្យសម្បត្តិ និងការពិចារណារឿងកូតានាំចូលសម្លៀកបំពាក់ទៅកាន់ទីផ្សារសហរដ្ឋអាមេរិកជាដើម។
ប៉ុន្តែប្រមុខរដ្ឋាភិបាលកម្ពុជា លោក ហ៊ុន សែន ធ្លាប់បានអះអាងថា សភាអាមេរិក និងសភាអឺរ៉ុប មិនអាចរុញឲ្យរដ្ឋាភិបាលរបស់ខ្លួនដាក់ទណ្ឌកម្មលើរដ្ឋាភិបាលកម្ពុជាបានទេ។
លោកថែមទាំងបានជំរុញបន្ថែមទៀត ឲ្យរឹបអូសទ្រព្យសម្បត្តិរបស់មន្រ្តីរដ្ឋាភិបាលរបស់លោក ប្រសិនបើពួកគេមានលុយរក្សាទុកនៅធនាគារក្រៅប្រទេសមែននោះ។
កាលពីចុងខែធ្នូ លោកប្រធានាធិបតីអាមេរិក Donald Trump ក៏បានចេញបទបញ្ជានីតិប្រតិបត្តិមួយដែលមានឈ្មោះថា ច្បាប់និងយុត្តិធម៌ ដើម្បីបង្កកទ្រព្យសម្បត្តិរបស់បុគ្គលដែលជាប់ទាក់ទងនឹងការរំលោភសិទ្ធិមនុស្សធ្ងន់ធ្ងរ ឬជាប់ទាក់ទងនឹងអំពើពុករលួយ។
ទោះបីប្រទេសកម្ពុជាមិនទាន់ស្ថិតនៅក្នុងបញ្ជីឧបសម្ព័ន្ធនេះក៏ដោយ ប៉ុន្តែមន្រ្តីអតីតគណបក្សសង្រ្គោះជាតិ បានទាញភ្ជាប់បទបញ្ជារបស់លោក Donald Trump នេះថា ជាដំណើរការមួយទៅកំណត់ “បញ្ជីខ្មៅ” ដែលកំពុងស្ថិតក្នុងដំណើរការរៀបចំដោយអនុគណៈកម្មការកិច្ចការបរទេសនៃសភាតំណាងរាស្រ្តសហរដ្ឋអាមេរិក ចំពោះបញ្ហាកម្ពុជា៕អត្ថបទ ទេព វណ្ណះ
