Ronaldo តាមទាន់កំណត់ត្រាឈ្នះពានកីឡាករល្អបំផុតប្រចាំឆ្នាំ Ballon d'Or ៥ដងដូច Messi ហើយ ប៉ុន្តែអភ័ព្ទសម្រាប់កីឡាករល្អៗដទៃជាច្រើនទៀត ដែលលេងបាល់ក្នុងជំនាន់អធិរាជបាល់ទាត់ទាំង២នេះ។ មួយទសវត្សចុងក្រោយនេះ មិនមានកីឡាករណាបានពាននេះឡើយក្រៅពីកីឡាករវ័យ៣២ឆ្នាំ សញ្ជាតិព័រទុយហ្គាល់ និង កីឡាករវ័យ៣០ឆ្នាំ សញ្ជាតិអាហ្សង់ទីន។
ខាងក្រោមនេះគឺជាកំពូលកីឡាករល្អៗ១០រូប មិនដែលស្គាល់រសជាតិឈ្នះពាន Ballon d'Or
១០ Frank Lampard
Frank Lampard ត្រូវបានគេចាត់ទុកថាជាអតីតកីឡាករដ៏ឆ្នើមបំផុតម្នាក់របស់ក្រុមតោខៀវ និង ខ្សែបម្រើជម្រើសអង់គ្លេស។ កីឡាកររូបនេះបានជួយ Chelsea ឈ្នះពានសំខាន់ៗចំនួន ១៣។ Lampard ក៏ជាផ្នែកមួយនៃ "យុគសម័យមាស" របស់អង់គ្លេសរួមជាមួយកីឡាករ Paul Scholes, Steven Gerrard, David Bakham, Michael Owen និង Wayne Rooney ជាដើម។
អតីតជម្រើសអង់គ្លេសបានត្រឹមបញ្ចប់ចំណាត់ថ្នាក់លេខ២ ក្នុងការប្រកួតប្រជែងពាន Ballon d'Or តាមពីក្រោយ Ronaldinho កាលពីឆ្នាំ ២០០៥។
៩ Zlatan Ibrahimovic
Ibrahimovic បានឈានដល់វ័យ៣៦ឆ្នាំហើយ ប៉ុន្តែការបង្ហាញសមត្ថភាពនៅលើទីលានមិនថមថយទៅតាមអាយុនោះទេ។ រដូវកាលមុន ខ្សែប្រយុទ្ធសញ្ជាតិស៊ុយអែត បានជួយក្រុមបិសាចក្រហមឲ្យឈ្នះពាន៣។ បច្ចុប្បន្នកីឡាករកំពស់១,៩៥ ម៉ែត្រ ស៊ុតបាល់បានច្រើនជាងគេនៅក្រុមជម្រើសជាតិស៊ុយអ៊ែត និង ក្លឹបចាស់របស់ខ្លួន Paris Saint-Germain ដែលរកបាន ១៥៦ គ្រាប់។
Ibrahimovic មិនដែលបានជាប់ចំណាត់ថ្នាក់សូម្បី top 3 លើតារាងពាន Ballon d'Or ។ កាលពីឆ្នាំ ២០១៣ កីឡាករនិយមសក់កំប៉ោយបានត្រឹមចំណាត់ថ្នាក់លេខ៤ ពីក្រោយកីឡាករ Cristiano Ronaldo, Lionel Messi និង Franck Ribery ។
៨ Thierry Henry
Henry ជានិមិត្តរូបរបស់ក្លឹប Arsenal ។ អតីតខ្សែប្រយុទ្ធសញ្ជាតិបារាំង ធ្លាប់ជួយ Arsenal មិនដែលស្គាល់ពាក្យចាញ់សោះនៅ Premier League រដូវកាល ២០០៣-០៤។ Henry ដែលបច្ចុប្បន្នជាជំនួយការគ្រូបង្វឹកក្រុមជម្រើសជាតិបែលហ្ស៊ិក បានត្រឹមជាប់លេខ៣ សម្រាប់ពាន Ballon d'Or កាលពីឆ្នាំ ២០០៦។
៧ Arjen Robben
ខ្សែបម្រើស្លាបសញ្ជាតិហូឡង់ ជួយឲ្យក្លឹបយក្សនៅអាឡឺម៉ង់ Bayern Munich ឈ្នះពាន Bundesliga ៦លើក ពានDFB Pokal ៤លើក និង Champions League ១លើក។ កីឡាករកំពូលល្បឿន បានត្រឹមបញ្ចប់ចំណាត់ថ្នាក់លេខ៤ សម្រាប់ពាន Ballon d'Or កាលពីឆ្នាំ ២០១៤។
៦ Xavi
Xavi Hernandezបានដើរតួយ៉ាងសំខាន់នៅក្នុងក្រុមអេស្ប៉ាញក្នុងការឈ្នះពានរង្វាន់ Euro 2008, World Cup 2010 និង Euro 2012។ Xavi បានត្រឹមជិតៗឈ្នះពាន Ballon d'Or ជាច្រើនលើកច្រើនសារដោយបញ្ចប់ចំណាត់ថ្នាក់លេខ៣ ក្នុងឆ្នាំ ២០០៩ ឆ្នាំ ២០១០ និង ២០១១។
៥ Gianluigi Buffon
Ballon d'Or តែងលំអៀងទៅរកខ្សែប្រយុទ្ធ ហើយសូម្បីខ្សែការពារក៏ទំនងជាមានឱកាសជាងអ្នកចាំទីដែរ។ មានតែអ្នកចាំទីរបស់រុស្ស៊ី Lev Yashinម្នាក់ប៉ុណ្ណោះដែលបានពាននេះគិតចាប់តាំងពីឆ្នាំ១៩៦៣ មក។
អ្នកចាំទីសញ្ជាតិអ៊ីតាលី Buffon វិះនឹងបានពាន Ballon d'Or កាលពីឆ្នាំ ២០០៦ ដោយបញ្ចប់ត្រឹមចំណាត់ថ្នាក់លេខ ២។
៤ Ryan Giggs
Giggs បានចូលរួមជាមួយ Man United នៅអាយុ ១៤ ឆ្នាំកាលពីឆ្នាំ ១៩៨៧ និង បានបង្ហាញខ្លួនឲ្យក្រុមបិសាចក្រហមចំនួន ៩៥០ ប្រកួត។ ជួយឲ្យក្លឹបឈ្នះពាន Premier League ចំនួន១៣លើក FA Cup ៤លើក និង Champions League ២លើក។ កីឡាករសញ្ជាតិវែលរូបនេះស៊ុតបាន ១៦៨ គ្រាប់។ Giggs មិនដែលជាប់សូម្បី top 3 ក្នុងបញ្ជីរបស់ពាន Ballon d'Or។
៣ Philipp Lahm
កីឡាករ Philipp Lahm ត្រូវបានគេចាត់ទុកថាជាខ្សែការពារដ៏ល្អបំផុតមួយនៃជំនាន់របស់គាត់។ Lahm បានជួយឲ្យក្លឹបឈ្នះពានរង្វាន់ Bundesliga ចំនួន៨លើក ពានDFB Pokals ៦លើក និង Champions League ១លើកជាមួយក្លិប Bayern Munich ដែលបានបង្ហាញខ្លួនជាង ៦០០ ប្រកួតសម្រាប់ក្លិបនេះ។
ខ្សែការពារកំពស់១,៧០ ម៉ែត្រសញ្ជាតិអាឡឺម៉ង់ បានបញ្ចប់ត្រឹមចំណាត់ថ្នាក់លេខ ៦ សម្រាប់ពាន Ballon d'Or កាលពីឆ្នាំ ២០១៤។
២ Paolo Maldini
Paolo Maldini គឺជាកីឡាករដែលជោគជ័យបំផុតក្នុងប្រវត្តិសាស្រ្តរបស់ក្លិប AC Milan និង ខ្សែការពារជម្រើសជាតិអ៊ីតាលី។ លោកបានជាប់លេខ ២១ ក្នុងបញ្ជីកីឡាករដ៏ល្អបំផុតរបស់ពិភពលោកកាលពីសតវត្សទី ២០ ។
Paolo Maldini ដែលបច្ចុប្បន្នមានវ័យ៤៩ឆ្នាំ បានលេងឲ្យក្លិប AC Milan ២៥រដូវកាល។ លោកធ្លាប់លេងនៅ World Cup ចំនួន ៤ដង និង UEFA European Championships ៣ដង។ គាត់បានត្រឹមជិតឈ្នះពាន Ballon d'Or ២ដង ដោយបញ្ចប់នៅចំណាត់ថ្នាក់លេខ៣ក្នុងឆ្នាំ ១៩៩៤ និង ២០០៣ ។
១ Andres Iniesta
Andres Iniesta ស៊ុត១គ្រាប់ជួយឲ្យអេស្ប៉ាញលើកពាន World Cup កាលពីឆ្នាំ២០១០។ កីឡាករដែលជោគជ័យបំផុតក្នុងប្រវត្តិសាស្រ្តបាល់ទាត់អេស្ប៉ាញរូបនេះ បង្ហាញខ្លួនឲ្យ Barcelona ចំនួន ៦៥០ប្រកួត។ កីឡាករកំពស់១,៧១ ម៉ែត្រ បានត្រឹមចំណាត់ថ្នាក់លេខ២ សម្រាប់ពាន Ballon d'Or កាលពីឆ្នាំ២០១០។