រាជធានីភ្នំពេញ ៖ គ្រឿងអលង្ការមាសលម្អរូបចម្លាក់សម័យអង្គរ ដែលត្រូវបានប្រតិភូក្រសួងវប្បធម៌ និងវិចិត្រសិល្បៈ និងសហភាពសហព័ន្ធយុវជនកម្ពុជា អញ្ជើញទៅដង្ហែពីទីក្រុងឡុងដ៍ ចក្រភពអង់គ្លេស បានត្រឡប់មកមាតុភូមិយើងវិញនៅព្រឹកថ្ងៃទី០២ ធ្នូ នេះ តាមច្រកអាកាសយានដ្ឋានអន្តរជាតិភ្នំពេញ នៅម៉ោង៩ព្រឹកនេះ ។
គ្រឿងអលង្ការមាស សម្រាប់លម្អរូបចម្លាក់សម័យអង្គរចំនួន១០ឈុត ធ្វើឡើងនៅក្នុងស្ថានទូតកម្ពុជា នៅទីក្រុងឡុងដ៍ ចក្រភពអង់គ្លេស រវាងក្រុមហ៊ុនដែលធ្វើការដេញថ្លៃលក់គ្រឿងអលង្ការ ជាមួយភាគីកម្ពុជាយើង ។
ពិធីប្រគល់នេះ ធ្វើឡើងក្រោមការចូលរួមពីមន្ត្រីក្រសួងការបរទេសអង់គ្លេស, លោកស្រីឯករាជទូតកម្ពុជា ប្រចាំប្រទេសអង់គ្លេស, លោក ហ៊ុន ម៉ានី ប្រធាន ស.ស.យ.ក, លោក ស សុខា អនុប្រធាន ស.ស.យ.ក ជាមួយនឹងមន្ត្រីក្រសួងវប្បធម៌ និងប្រជាពលរដ្ឋ និស្សិត ដែលរស់នៅទីក្រុងឡុងដ៍មួយចំនួនទៀតផងដែរ។
ក្នុងពិធីទទួលនោះក៏មានការរៀបចំ ពិធីបន់ស្រន់សូមសេចក្តីសុខ ក្នុងការនាំយកគ្រឿងអលង្ការមាស សម្រាប់លម្អរូបចម្លាក់សម័យអង្គរ ត្រឡប់មកកម្ពុជាវិញ ឲ្យជួបតែសេចក្តីសុខ សេចក្តីចំរើន។
គួររំលឹកថា កាលពីល្ងាចថ្ងៃទី២៨ វិច្ឆិកាគណៈប្រតិភូសហភាពសហព័ន្ធយុវជនកម្ពុជា និងក្រសួងវប្បធម៌ និងវិចិត្រសិល្បៈ បានចាកចេញពីកម្ពុជា ឆ្ពោះទៅកាន់ទីក្រុងឡុងដ៍ ចក្រភពអង់គ្លេស ទីដែលគ្រឿងអលង្ការមាស សម្រាប់លម្អរូបចម្លាក់ សម័យអង្គរបានដាក់តាំងនៅទីនោះ ដើម្បីធ្វើការដង្ហែយកមកកាន់កម្ពុជាវិញ ។
