ដំណាំកញ្ឆាលួចលាក់ជិត៣ម៉ឺនដើម ដាំទុកនាំចេញទៅស្រុកយួន
28/11/2017
ខេត្តតាកែវ ៖ ដោយសារដំណាំកញ្ឆាមានទីផ្សារនៅឯប្រទេសវៀតណាមនោះបានធ្វើឱ្យប្រជាពលរដ្ឋចេះតែលួចលាក់ដាំដោយខុសច្បាប់ដោយមិនមានការភ័យខ្លាចច្បាប់បន្តិចណាឡើយហើយការលួចលាក់កញ្ឆាដោយខុសច្បាប់នេះត្រូវបានប៉ូលិសស្រុកគីរីវង់ចុះដកនិងដុតបំផ្លាញដោយចោលបានរាប់សែនដើម ។ ជាក់ស្តែងពេញមួយថ្ងែទី២៧ ខែវិច្ឆិកា ឆ្នាំ២០១៧ កន្លងទៅនេះកំលាំងសមត្ថកិច្ចស្រុកគីរីវង់បានធ្វើការចុះដក និងដុតដំណាំកញ្ឆាដែលប្រជាពលរដ្ឋលួចលាក់ដាំដោយខុសច្បាប់បានប្រមាណជិត៣ម៉ឺនដើមនៅចំណុចខ្នងបន្ទាយចាស់ ដាបែកថ្លាល់ ជ្រោះឃ្លី ក្នុងភូមិជ្រោយ ឃុំព្រះបាទជាន់ជុំ ស្រុកគីរី ខេត្តតាកែវ ។
លោកវរសេនីយ៍ឯក យ៉ុគ សារ៉ាត់ អធិការនគរបាលស្រុកគីរីវង់បានឱ្យដឹងថា ក្រោមការបញ្ជាផ្ទាល់របស់លោកឧត្តមសេនីយ៍ទោ សុខ សំណាង ស្នងការនគរបាលខេត្តឱ្យកំលាំងរបស់លោកដោយមានកិច្ចសហការជាមួយយោធា ប៊េអឹម និងអាជ្ញាធរស្រុក ឡើងទៅលើភ្នំដក និងដុតដាំណាំកញ្ឆាដែលប្រជាពលរដ្ឋបានលួចដាំដោយខុសច្បាប់ដូចភ្លៀងរលឹម ។
លោកអធិការនគរបាលស្រុកបានបន្តទៀតថា នៅថ្ងែនេះកំលាំងសមត្ថកិច្ចបានធ្វើការដកដំណាំកញ្ឆាបានចំនួន២៨.១១៤ដើម ចំនួន៨៣ទីតាំង និងអណ្តូងទឹកសំរាប់ផ្គត់ផ្គង់ដំណាំកញ្ឆាមានចំនួន១០៤អណ្តូង ជាលទ្ធផលក្រោយពេលដករួចកំលាំងសមត្ថកិច្ចប្រមូលដុតចោលនៅនឹងកន្លែងតែម្តង ។
គួរំលឹកផងដែរថា ក្នុងឆ្នាំ២០១៧នេះកំលាំងសមត្ថកិច្ចស្រុកគីរីវង់បានដក និងដុតបំផ្លាញដំណាំកញ្ឆាដែលប្រជាពលរដ្ឋលួចលាក់ដាំដោយខុសច្បាប់បានចំនួន៥លើក ស្មើនឹង៦៦០ទីតាំង អណ្តូងសំរាប់ប្រស់កញ្ឆាមាន២៨៨អណ្តូងដំណាំកញ្ឆាបាន២៥៧.១៧៩ដើម ។
