Arsenal លេងមួយក្បាច់ដាច់ចង្កេះអ្នកគាំទ្រ ចាញ់ក្រុមបាតតារាងលីគអាល្លឺម៉ង់
24/11/2017
ក្រុមកាំភ្លើងធំ Arsenal ដែលជាក្លឹបខ្លាំងមួយនៅអង់គ្លេស បានភ្លាត់ចាញ់ក្រុមបាតតារាងនៅលីគអាល្លឺម៉ង់ Koln ក្នុងលទ្ធផល ១-០ កាលពីយប់មិញនេះ ក្នុងវគ្គជម្រុះ Europa League ។
ក្នុងការប្រកួតយប់មិញនេះ ក្រុមលោក Wenger បានជាប់ទៅវគ្គបន្ដទៅហើយ ណាមួយលេងជាមួយក្រុមមិនសូវខ្លាំងផង ទើបបណ្ដាលឱ្យតាបារាំងដាក់កីឡាករលេងមិនពេញជើងនោះទេ ផ្ដល់ឱកាសឱ្យអ្នកមិនសូវបានលេងចូលលេង។ យ៉ាងណាមិញ លទ្ធផលហាក់ដូចជាមិនធ្វើឱ្យអ្នកគាំទ្រសប្បាយចិត្តឡើយ ដោយសារតែបរាជ័យ ១-០ ជាមួយក្រុមម្ចាស់ផ្ទះយ៉ាងនេះ។
ចំពោះរឿងបរាជ័យខាងលើនេះដែរ លោក Wenger បាននិយាយថា៖ “យើងតែងតែភ្លាត់ឱកាសជាច្រើនដង។ បាល់របស់គេដែលទាត់ចូលយើងនោះ មិនសមជាបាល់ប៉េណាល់ទីឡើយ ខ្ញុំគិតថាវាមិនសក្ដិសមទេ”។
ការឈ្នះ Arsenal យប់មិញបានធ្វើឱ្យក្រុម Koln នៅមានឱកាសយកលេខ២ឡើងទៅវគ្គបន្ដបាន ដោយរង់ចាំមើលការប្រកួតចុងក្រោយទៀត។ ប្រកួតចុងក្រោយកាត់សេចក្ដីនោះ គឺពួកគេប៉ះក្រុម Crvena Zvezda ខណៈដែល Arsenal ប៉ះជាមួយ Bate ៕
