ខ្សែប្រយុទ្ធ Paulo Dybala
Dybala បានថ្លែងប្រាប់ France Football ថា៖ "ខ្ញុំមិនច្បាស់ថាខ្ញុំអាចលេងឲ្យ Juventus បានមួយជីវិតនោះទេ។ តាមពិតទៅ ខ្ញុំមិនអាចទាំងនិយាយបានថា ឆ្នាំនេះមិនមែនជាឆ្នាំចុងក្រោយរបស់ខ្ញុំនៅក្លឹបមួយនេះផង"។
បន្ថែមពីលើការបង្ហាញភាពមិនច្បាស់លាស់នៃអនាគតរបស់ខ្លួននៅ Juventus ខ្សែប្រយុទ្ធសញ្ជាតិអាហ្សង់ទីនរូបនេះ បានងាកមកនិយាយសរសើរ Lionel Messi វិញថា៖ "បើទោះជាខ្ញុំកោតសរសើរ Ronaldinho ក៏ដោយ តែ Leo (ឈ្មោះខ្លីរបស់ Messi) ជាកីឡាករដ៏កំពូល។ គេដូច Diego Maradona ក្នុងជំនាន់យើងអ៊ីចឹង"។
Dybala បានបន្តទៀតថា៖ "វាគឺជាកិត្តិយសធំណាស់សម្រាប់ខ្ញុំ ដែលអាចបានលេងជាមួយគេនៅក្នុងក្រុមជម្រើសជាតិ។ ការស៊ុតចូលបីគ្រាប់របស់គេទៅលើ Ecuador បានជួយយើងឲ្យឡើងទៅលេង World Cup ឆ្នាំក្រោយ។ គេពិតជាស័ក្ដិសមជាមេដឹកនាំនៅក្នុងក្រុមមែន"។
តាំងពីដូរមក Juventus ក្នុងឆ្នាំ ២០១៥ ខ្សែប្រយុទ្ធ Paulo Dybala បានវិវឌ្ឍខ្លួនយ៉ាងខ្លាំង រហូតក្លាយជាកីឡាករលំដាប់កំពូលមួយរូប ក្នុងរយៈពេលចុងក្រោយនេះ។ កាលពីអំឡុងទីផ្សារដោះដូរកីឡាករកន្លងទៅនេះ មានពាក្យចចាមអារាមជាច្រើនថា Barcelona បានតាមទិញDybala ដើម្បីជំនួស Neymar ។ ទោះជាយ៉ាងណាក្លឹបអ្នកមានបុណ្យ ចុងក្រោយសម្រេចទិញ Ousmane Dembele ទៅវិញ៕
