លោក ដាយរិក ថមសាន់ ជាតិអូស្ត្រាលី ដែលជាម្ចាស់អភិរក្សដំរីនេះបានឱ្យដឹងថា (ខាំលីន) បានងាប់កាលពីវេលាម៉ោងប្រមាណ៥ល្ងាចថ្ងៃទី៦ ខែតុលា ។ លោកបន្តថា (ខាំលីន)រួមនឹងដំរីញី៣ក្បាលទៀត គឺគាត់ទិញមកពីខេត្តមណ្ឌលគិរីចំនួន២ក្បាល និងខេត្តរតនគិរីចំនួន២ក្បាលកាលពីអំឡុងឆ្នាំ២០១២ ដើម្បីធ្វើការអភិរក្ស និងសិក្សាពីរបៀបរស់នៅរបស់ដំរីនៅក្នុងប្រទេសកម្ពុជា ក្រោយពីរាជរដ្ឋាភិបាលកម្ពុជា បានអនុញ្ញាតឱ្យគាត់រៀបចំទីតាំងនៅតំបន់អភិរក្សបរិស្ថានគូលែន-ព្រហ្មទេព ស្ថិតនៅប៉ែកឧត្តរនៃប្រទេសកម្ពុជា ។
លោក ដាយរិក ថមសាន់ បន្ថែមថា លោកមានការសោកស្តាយដំរី«ខាំលីន» ដែលលោកអស់សមត្ថភាពក្នុងការជួយសង្គ្រោះព្រោះតែវ័យចាស់ជរារបស់វា ។ លោកបានរៀបចំកប់សពដំរីនេះនៅក្បែរស្នាក់ការអភិរក្ស និងនិមន្តព្រះសង្ឃសូត្រមន្តបង្សុកូលទៅតាមប្រពៃណីខ្មែរផងដែរ ៕
