លោក ឈុន សិទ្ធី ភេទប្រុស អាយុ៣៨ឆ្នាំ ត្រូវបានអាជ្ញាធរខេត្តប៉ៃលិនឃាត់ខ្លួន កាលពីវេលាម៉ោង ២និង៤៧នាទីរសៀល ថ្ងៃទី២៤ តុលា ក្រោយពីសមាជិកក្រុមប្រឹក្សាឃុំស្ទឹងកាច់ស្រុកវសាលាក្រៅ ខេត្តប៉ៃលិន មកពីគណបក្សសង្គ្រោះជាតិរបនេះ បានបង្ហោះវីដេអូឃ្លីបដោយជាប់សង្ស័យថា ជាការប្រមាថ និងញុះញង់ឱ្យមានការរើសអើង។ គិតមកដល់រសៀលថ្ងៃទី ២៥ តុលានេះ លោក ឈុន សិទ្ធី ត្រូវបានឃុំខ្លួននៅឯស្នងការដ្ឋាននគរបាលខេត្តប៉ៃលិន ដើម្បីត្រៀមចាត់វិធានការទៅតាមផ្លូវច្បាប់។សមត្ថកិច្ចខេត្តប៉ៃលិន បានអះអាងថា ការឃាត់ខ្លួនលោក ឈុន សិទ្ធី គឺដោយសារតែសកម្មជនគណបក្សប្រឆាំងរូបនេះ បានជាប់ព័ន្ធនឹងករណីសង្ស័យចំនួនពីរ។ ទី១. ការធ្វើឱ្យប៉ះពាល់ដល់សិទ្ធិខាងរូបភាពនៃបុគ្គល និងបទស្តាប់ រឺថតពាក្យសម្តីឯកជន នៅចំណុចសាលាឃុំស្ទឹងកាច់ ស្រុកសាលាក្រៅ ខេត្តប៉ៃលិន កាលពីថ្ងៃទី២១ ខែសីហា ឆ្នាំ២០១៧ និងទី២. ពីបទញុះញង់ឱ្យមានការរើសអើងនៅក្នុងសង្គម។
នេះបើតាមការចុះផ្សាយរបស់សារព័ត៌មានក្នុងស្រុក។ ប៉ុន្តែអ្វីជាការកត់សំគាល់ ការឃាត់ខ្លួន សមាជិកក្រុមប្រឹក្សាឃុំសង្កាត់មកពីគណបក្សសង្គ្រោះជាតិរូបនេះ គឺបានកើតឡើងនៅមួយថ្ងៃក្រោយពីសកម្មជនគណបក្សប្រឆាំងរូបនេះ បានបង្ហោះវីដេអូឃ្លីបមួយ កាលពីថ្ងៃទី ២៣ តុលា ដោយបានបដិសេធចុះចូលជាមួយគណបក្សប្រជាជនកម្ពុជា តាមការអំពាវនាវរបស់លោកនាយករដ្ឋមន្ត្រី ហ៊ុន សែន។ នៅក្នុងវីដេអូឃ្លីបប្រមាណជា៣នាទី ហើយដែលត្រូវបានគេចែករំលែកនៅលើបណ្តាញសង្គមហ្វេសបុកកាលពីថ្ងៃទី ២៣ តុលានោះ លោក ឈុន សិទ្ធី ដែលមានតួនាទីជាសមាជិកក្រុមប្រឹក្សាឃុំស្ទឹងកាច់ ស្រុកសាលាក្រៅ ខេត្តប៉ៃលិន បានអះអាងថា លោកនឹងមិនចុះចូលជាមួយគណបក្សកាន់អំណាចជាដាច់ខាត ទោះបីជាត្រូវបាត់បង់ប្រាក់ខែ និងតួនាទីរបស់ខ្លួន ដោយសារតែការរំលាយគណបក្សសង្គ្រោះជាតិក៏ដោយ។ជាមួយគ្នានេះ មន្ត្រីផ្នែកច្បាប់គណបក្សសង្គ្រោះជាតិបានចាត់ទុកថា ករណីនៃការឃាត់ខ្លួនសកម្មជនគណបក្សសង្គ្រោះជាតិរូបនេះ គឺជាការគំរាមកំហែងទៅលើសកម្មជននៅមូលដ្ឋានរបស់គណបក្សសង្គ្រោះជាតិ ខណៈដែលមានការរិះគន់ថា ការចាប់ខ្លួនសកម្មជនគណបក្សសង្គ្រោះជាតិរូបនេះ បានធ្វើឡើងដោយគ្មានដីកានោះឡើយ៕អត្ថបទដកស្រង់ ទេព វណ្ណះ
