ជនជាប់ចោទ ដែលចៅក្រមតុលាការបន្ថែមទណ្ឌកម្មទោសនេះ ឈ្មោះ នុជ សំណាង ហៅ សែន សំណាង ហៅវែង ភេទប្រុស អាយុ២៧ឆ្នាំ មានមុខរបរជាចោរប្លន់អាជីព។ សេចក្ដីសម្រេចរបស់ចៅក្រមតុលាការ ធ្វើឡើងនៅចំពោះមុខជនជាប់ចោទ និង បើកផ្លូវប្ដឹងឧទ្ធរណ៍តាមកំណត់ច្បាប់។
គួររំលឹកថា កាលពីថ្ងៃទី៦ ខែកញ្ញា ឆ្នាំ២០១៦ កន្លងទៅ លោកចៅក្រម ជា សុខចាន់ដេត បានប្រកាសសាលក្រមនូវសំណុំរឿងព្រហ្មទណ្ឌប្លន់ប្រដាប់អាវុធចំនួន ៧ ករណី ដែលប្រព្រឹត្តដោយទណ្ឌិតឈ្មោះ នុជ សំណាង ហៅ សែន សំណាង ហៅវែង ដោយសម្រេចផ្ដន្ទាទោសដាក់ពន្ធនាគាររយៈពេល៤៩ឆ្នាំ។
បន្ទាប់មកតុលាការបានបន្តជំនុំជម្រះលើសំណុំរឿងប្លន់ប្រដាប់អាវុធ ចំនួន ៨ ករណីផ្សេងទៀត របស់ទណ្ឌិតឈ្មោះ នុជ សំណាង នេះ និង បក្ខពួក ដោយផ្ដន្ទាទោសដាក់ពន្ធនាគារបន្ថែមរយៈពេល៤៤ឆ្នាំ ហើយនៅថ្ងៃនេះ តុលាការបានបន្ថែមទណ្ឌកម្មទោសរយៈពេល ២៨ ឆ្នាំទៀត ធ្វើឱ្យទណ្ឌិតឈ្មោះ នុជ សំណាង ហៅ សែន សំណាង ម្នាក់នេះ ត្រូវមានទោសជាប់ពន្ធនាគារដល់ទៅ ១២១ ឆ្នាំ ពិតជាមហាសែនសំណាងដូចឈ្មោះមែន ៕
