ផ្លាស់ប្តូរប្រធានមន្ទីរអភិវឌ្ឍន៍ជនបទខេត្តកំពង់ឆ្នាំងថ្មី
បញ្ចូលដោយ៖ Laiheang Vobfm - 19/10/2017ខេត្តកំពង់ឆ្នាំង ៖ឯកឧត្តម អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ កាលពីរសៀល ថ្ងៃទី១៨ ខែតុលា ឆ្នាំ២០១៧ បានអញ្ជើញជាអធិបតីភាព ក្នុងពិធីប្រកាសចូលកាន់ដំណែង ប្រធានមន្ទីរអភិវឌ្ឍន៍ជនបទ ដែលបានប្រព្រឹត្តទៅនៅសាលាខេត្តកំពង់ឆ្នាំង ដោយមានការអញ្ជើញចូលរួមពីឯកឧត្តម ឈួរ ចន្ទ័ឌឿន អភិបាលកំពង់ឆ្នាំង និងមន្ត្រីរាជការកងកម្លាំង ប្រដាប់អាវុធជាច្រើនរូបទៀត ។
បន្ទាប់ពីអានសេចក្តីប្រកាសតែងតាំង លោក ជិន រដ្ឋា ចូលកាន់តំណែងជាប្រធានមន្ទីរអភិវឌ្ឍន៍ជនបទខេត្តកំពង់ឆ្នាំងថ្មី ជំនួសលោក លាង សេង ប្រធានមន្ទីរអភិវឌ្ឍន៍ចាស់ ត្រូវទៅទទួលភារកិច្ចថ្មី និងការប្រគល់ត្រារួចមក ឯកឧត្តម ឈួរ ចន្ទ័ឌឿន បានមានប្រសាសន៍ថា ៖ ការផ្លាស់ប្តូរភារកិច្ចនៅពេលនេះ គឺជាឋានានុក្រមរបស់រាជរដ្ឋាភិបាល ព្រោះអ្នកចាស់បានមកបម្រើភារកិច្ចនៅមន្ទីរអភិវឌ្ឍន៍ជនបទនេះ យូរឆ្នាំហើយដែរ ដល់ពេលដែលត្រូវបន្តឡើងទៅកាន់ភារកិច្ចថ្មីទៀត និងយកអ្នកថ្មីមកបន្ត មិនមែនថា អ្នកចាស់មានកំហុសខុសឆ្គងអ្វីនោះទេ តែនេះជាលក្ខន្តិករបស់មន្ត្រីរាជការ ។ ជាមួយគ្នានេះ សូមឲ្យអ្នកចូលកាន់ដំណែងថ្មី ត្រូវពិនិត្យមើលការងារឲ្យគ្រប់ជ្រុងជ្រោយ និងកត្តាសំខាន់គឺការឯកភាព សាមគ្គីផ្ទៃក្នុងឲ្យបានល្អ ទើបការងាររីកចម្រើនទៅបាន ។
មានប្រសាសន៍សំណេះសំណាលនៅក្នុងពិធីនោះ ឯកឧត្តម អ៊ុក រ៉ាប៊ុន បានលើកឡើងថា ឈរលើគោលនយោបាយ កំណែទម្រង់ស៊ីជំរៅរបស់រាជរដ្ឋាភិបាល មន្ត្រីរាជការ ត្រូវយកចិត្តទុកដាក់បម្រើសេវាជូនប្រជាពលរដ្ឋឲ្យបានទាន់ពេលវេលា ។ ឯកឧត្តមក៏បានផ្ដាំផ្ញើដល់លោកប្រធានមន្ទីរទើបតែងតាំងថ្មី ត្រូវខិតខំបំពេញភារកិច្ចឲ្យបានល្អក្នុងការគ្រប់គ្រងបែងចែកតួនាទី ភារកិច្ចដល់មន្ត្រីនៅក្រោមឱវាទឲ្យបានច្បាស់លាស់ត្រឹមត្រូវ តាមសមត្ថភាព ។ ត្រូវលុបបំបាត់ភាពអសកម្ម លុបបំបាត់អំពើពុករលួយ និងមានតម្លាភាពចំពោះមន្ត្រីរាជការរបស់ខ្លួន ហើយសហការជាមួយអាជ្ញាធរដែនដីគ្រប់លំដាប់ថ្នាក់ ឆ្ពោះទៅអភិវឌ្ឍន៍នៅមូលដ្ឋានដើម្បីរួមចំណែកយ៉ាងសកម្ម សំដៅកាត់បន្ថយភាពក្រីក្ររបស់ប្រជាពលរដ្ឋ ។
លោក ជិន រដ្ឋា បានធ្វើការប្តេជ្ញាចិត្ត ដោយខិតខំយកចិត្តទុកដាក់ក្នុងការបំពេញភារកិច្ចឲ្យអស់ពីកម្លាំងកាយចិត្ត ចូលរួមអនុវត្តកម្មវិធីកំណែគ្រប់វិស័យរបស់រាជរដ្ឋាភិបាល ខិតខំបំពេញភារកិច្ចឲ្យបានម៉ឺងមាត់តាមច្បាប់ និងបទបញ្ញត្តិនានារបស់រដ្ឋ និងសហការជាមួយអាជ្ញាធរមូលដ្ឋាន បណ្ដាមន្ទីរអង្គភាពជុំវិញខេត្ត និងសាមគ្គីភាពផ្ទៃក្នុងឲ្យបានល្អ ៕