ករណីនេះបានកើតឡើងកាលពីវេលាម៉ោង ៥ និង ៣០នាទីល្ងាច ថ្ងៃទី១៧ ខែតុលា ឆ្នាំ២០១៧ នៅចំណុចផ្ទះជួលដំបូលខៀវ ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យឈ្មោះ ព្រាប បញ្ញា ភេទប្រុស អាយុ៣៦ឆ្នាំ មុខរបរមិនពិតប្រាកដ ស្នាក់នៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។ ជនរងគ្រោះឈ្មោះ អៀត សុខជា ភេទប្រុស អាយុ២៤ឆ្នាំ មុខរបរកម្មកររោងចក្រ ស្នាក់នៅផ្ទះជួលដំបូលខៀវកន្លែងកើតហេតុ មានស្រុកកំណើតនៅភូមិអូសកន្ទុយ ឃុំស្មោងខាងត្បូង ស្រុកកំចាយមា ខេត្តព្រៃវែង។ ម៉ូតូដែលជនសង្ស័យលួចម៉ាកឌ្រីមសង់ពណ៌ខ្មៅ ស៊េរី២០១៧ ពាក់ស្លាកលេខ ភ្នំពេញ ១DA-២៩៤៧។
តាមប្រភពព័ត៌មានពីជនរងគ្រោះបាននិយាយថា នៅមុនពេលកើតហេតុរូបគាត់ទើបចេញពីរោងចក្រ ហើយបានទុកម៉ូតូនៅមុខបន្ទប់ជួល។ បន្ទាប់មករូបគាត់បានទុកសោម៉ូតូនៅលើតុក្នុងបន្ទប់ ដោយមិនបានបិទទ្វារបន្ទប់ឡើយ ក្រោយមករូបគាត់បានចូលទៅក្នុងបន្ទប់ទឹក លុះគាត់ចេញពីបន្ទប់ទឹកវិញ ស្រាប់តែឃើញជនសង្ស័យជិះម៉ូតូគាត់ចេញទៅ ហើយគាត់បានស្រែកថា ចោៗ នាំឲ្យប្រជាពលរដ្ឋជួយដេញផ្អើលពេញផ្ទះជួល ហើយបន្ទាប់មកសន្តិសុខនៅយាមទ្វាររបងបានបិទទ្វារ និង ឃាត់ខ្លួនបានភ្លាមៗផងដែរ។
ប្រភពបានបន្តទៀតថា ក្រោយចាប់ជនសង្ស័យបានហើយនោះ ប្រជាពលរដ្ឋបាននាំគ្នាឆែកនៅលើដងខ្លួនជនសង្ស័យឃើញមានប្រដាប់កាច់សោ.កម៉ូតូចំនួន២ និង កូនសោ១ ដោយដាក់ក្នុងខោលីអូ ហើយប្រជាពលរដ្ឋបាននាំគ្នាវាយបណ្តាលឲ្យជនសង្ស័យខាងលើរងរបួសយ៉ាងធ្ងន់ធ្ងរ សន្លប់សល់តែដង្ហើមចង្រិត។
ក្រោយពេលកើតហេតុ ជនសង្ស័យដោយសារងរបួសធ្ងន់ពេក កម្លាំងសមត្ថកិច្ចបានហៅរថយន្តសង្គ្រោះមន្ទីរពេទ្យបង្អែកពោធិ៍ចិនតុង ដឹកយកទៅព្យាបាលនៅមន្ទីរពេទ្យព្រះកុសុមៈ ចំណែកជនរងគ្រោះបានទៅដាក់ពាក្យបណ្តឹង ដើម្បីឱ្យសមត្ថកិច្ចចាត់ការតាមនីតិវិធី ៕
