បាត់ដំបង ៖ អំពើហិង្សាមួយ ដែលឈានដល់ការប្រើប្រាស់កម្លាំងបាយ និងបង្ករបួសស្នាម បានផ្ទុះឡើងមួយប្រាវរវាងថៅកែចិន ជាមួយនឹងមេការគ្រប់គ្រង ដែលជាជនជាតិចិនដូចគ្នា ហើយក្នុងនោះ ក៏មានកម្មករខ្មែរចូលរួមប្រមាណពី៤០នាក់ទៅ៥០ នាក់ផងដែរ ជុំវិញបញ្ហារឿងការបើកប្រាក់ខែ ដែលកន្លងមកថៅកែមិនដែលបើកប្រាក់ខែឲ្យកម្មករទៀងទាត់ពេលវេលានោះឡើយ។គួរបញ្ជាក់ដែរថា កន្លងមកទីតាំងក្រុមហ៊ុនស៊ីម៉ងត៍នៅភ្នំដូនមាយ ស្ថិតក្នុងភូមិដូនមាយ ឃុំស្តៅ ស្រុករតនៈមណ្ឌល ខេត្តបាត់ដំបង គឺជាទីតាំងរបស់ក្រុមហ៊ុនចិន ដែលតែងតែមានបញ្ហាជាញឹកញាប់ជុំវិញរឿងប្រាក់ខែ ដែលបើកឲ្យកម្មករមិនទៀងទាត់ រហូតធ្វើឲ្យមានរឿងរ៉ាវកើតឡើងជារឿយៗ។
លុះនៅល្ងាចថ្ងៃទី១៣ ខែតុលា ឆ្នាំ២០១៧ នេះ ក៏ស្រាប់តែមានហិង្សាមួយបានផ្ទុះឡើងរវាងខាងថៅកែចិន ជាមួយនឹងមេការដែលជាជនជាតិចិនដូចគ្នា ហើយក៏មានការគាំទ្រ និងចូលរួមពីកម្មករខ្មែរប្រមាណ ពី៤០នាក់ ទៅ៥០នាក់ដែរ ដោយសារតែគ្មានដំណោះស្រាយ និងការចរចាត្រូវរ៉ូវគ្នាសោះ ក៏ឈានដល់ការប្រើប្រាស់កម្លាំងបាយដាក់គ្នា ដែលធ្វើឲ្យភាគីម្ខាងរងរបួសស្រាល៣នាក់។ក្រោយពីកម្លាំងកងរាជអាវុធហត្ថ ដែលឈរជើងនៅក្នុងក្រុមហ៊ុន បានធ្វើការសិក្សា និងស្រាវជ្រាវគឺមូលហេតុ មកពីខាងភាគីមេការ សុំបើកប្រាក់មុនថ្ងៃកំណត់ ក៏កើតជារឿងរ៉ាវទាស់ទែងគ្នាតែម្តង បច្ចុប្បន្នភាគីរងរបួសបានឡើងទៅក្រុងភ្នំពេញហើយ ដើម្បីពិនិត្យសុខភាព ឯកម្លាំងសមត្ថកិច្ចក៏កំពុងចាត់វិធានការដោះស្រាយផងដែរ៕អត្ថបទដកស្រង់ ទេព វណ្ណះ
