ប្រភពឱ្យដឹងថា ជនរងគ្រោះទាំង២នាក់ ម្នាក់ឈ្មោះស្រី ភក្តី អាយុ២៩ឆ្នាំ មានទីលំនៅភូមិអូរល្វា ឃុំជ្រៃសីមា ស្រុកសំពៅលូន ខេត្តបាត់ដំបង និងម្នាក់ទៀតឈ្មោះរឿម រឹម ហៅងោល អាយុ៣០ឆ្នាំ មានទីលំនៅភូមិល្វា ឃុំបឹងបេង ស្រុកម៉ាឡៃ ខេត្តបន្ទាយមានជ័យ។ ដែលទាំង២នាក់ ត្រូវបានទាហានថៃបញ្ជូនទៅសង្គ្រោះភ្លាមៗ ក្រោយពេលកើតហេតុ ។
គួរបញ្ជាក់ថា ពលរដ្ឋខ្មែរទាំង២នាក់ ត្រូវបានប្រភពរាយការណ៍ថា ត្រូវពលរដ្ឋថៃបាញ់របួសធ្ងន់លើទឹកដីថៃ ក្នុងភូមិរ៉ាសុភី ឃុំប ស្រុកខ្លងហាត ខេត្តស្រះកែវ ឈមទឹកដីកម្ពុជាស្រុកសំពៅលូន កាលពីល្ងាចថ្ងៃទី១០ តុលា កន្លងមក ចោទថា បានលួចមាន់ ។ ប្រភពបន្តថា ព័ត៌មាននេះ ត្រូវនគរបាលប៉ុស្តិរដ្ឋបាល ឃុំជ្រៃសីម៉ា ទទួលសេចក្តីរាយការណ៍ពីពលរដ្ឋតាមទូរស័ព្ទ បន្ទាប់មកចុះស្រាវជ្រាវ ជួបពលរដ្ឋ ដែលមកពីបេះម្ទេសឱ្យថៅកែថៃឈ្មោះម៉ៅ ចន្ធី ភេទប្រុស អាយុ៣០ឆ្នាំ រស់នៅភូមិអូរល្វា ឃុំជ្រៃសីម៉ា ប្រាប់ថា ពេលគាត់វិលត្រឡប់ពីដីថៃ ប្រទះឃើញជនរងគ្រោះទាំង២រងរបួសធ្ងន់ ហើយត្រូវកម្លាំទាហានឈុតខ្មៅថៃ លើកដាក់រថយន្តយកទៅមន្ទីរពេទ្យក្នុងស្រុកកើតហេតុគឺស្រុកខ្លងហាត ។
