ភ្នំពេញ ៖ ស្រី្តបីនាក់ប្រកបមុខរបរបើកល្បែងស៊ីសង (កត់កន្ទុយលេខយួន) ត្រូវបានបានចៅក្រមស៊ើបសួរសាលាដំបូងរាជធានីភ្នំពេញ សម្រេចកាលពីល្ងាចថ្ងៃទី០៨ ខែតុលា ឆ្នាំ២០១៧ ចេញដីកាឃុំខ្លួនដាក់ពន្ធនាគារព្រៃសជាបណ្ដោះអាសន្ន ក្រោមការចោទប្រកាន់ពីបទបើកល្បែងស៊ីសងខុសច្បាប់។
ជនជាប់ចោទ ទី១ ឈ្មោះ ឈុន សោភ័ណ្ឌ ហៅ នាង អាយុ៤០ឆ្នាំ ស្នាក់នៅផ្ទះលេខ១៨១ ផ្លូវ៣១បេ សង្កាត់បឹងទំពុន ខណ្ឌមានជ័យ,ទី២ ឈ្មោះ ម៉េង ហ៊ាង ហៅ អូន អាយុ៤៧ឆ្នាំ ស្នាក់នៅផ្ទះគ្មានលេខ ផ្លូវ៣១BT សង្កាត់បឹងទំពុន ខណ្ឌមានជ័យ និង ទី៣ ឈ្មោះ ចាន់ ណារី អាយុ២៥ឆ្នាំ ស្នាក់នៅផ្ទះជួល ផ្លូវបេតុង សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
ស្ត្រីមេកន្ទុយលេខទាំង៣នាក់ ត្រូវកម្លាំងសមត្ថកិច្ចកងរាជអាវុធហត្ថរាជធានីភ្នំពេញ ធ្វើការឃាត់ខ្លួនកាលពីថ្ងៃទី០៤ ខែតុលា នៅផ្សារប៉េសេ ខណៈពួកគេកំពុងប្រព្រឹត្តបទល្មើសជាក់ស្តែង (កត់កន្ទុយលេខយួនខុសច្បាប់)។ ពេលសមត្ថកិច្ចឃាត់ខ្លួនស្ត្រីបីនាក់ជាមេកន្ទុយលេខនោះ មានការដកវត្ថុតាងដូចជា ម៉ាស៊ីនគិតលេខចំនួន៣គ្រឿង ឯកសារសម្រាប់កត់កន្ទុយលេខមួយចំនួន ទូរស័ព្ទដៃ៣គ្រឿង ប្រាក់ ១១៤០០០០ រៀល និងសម្ភារៈពាក់ព័ន្ធមួយចំនួនទៀត។
ក្រោយពីឃាត់ខ្លួន សមត្ថកិច្ចបានរកឃើញថា ស្ត្រីជាប់ចោទបានប្រព្រឹត្តបទល្មើសមិនរាងចាល ទើបត្រូវបានសមត្ថកិច្ចកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ តាមផ្លូវច្បាប់។ បន្ទាប់មកជនសង្ស័យត្រូវបានតំណាងអយ្យការសាលាដំបូងរាជធានីភ្នំពេញ ធ្វើការសាកសួរអស់រយៈពេល២ថ្ងៃ និង បានសម្រេចធ្វើការចោទប្រកាន់ជាផ្លូវការ ពីបទបើកល្បែងស៊ីសងខុសច្បាប់ និង បានចាត់បញ្ជូនទៅខាងចៅក្រមស៊ើបសួរ ហើយចៅក្រមសម្រេចចេញដីកាឃុំខ្លួនពួកគេដាក់ពន្ធនាគារព្រៃសជាបណ្ដោះអាសន្នដើម្បីរង់ចាំការកាត់ទោស ។
ពាក់ព័ន្ធការឃុំខ្លួនស្ត្រីមេកន្ទុយលេខបីនាក់ខាងលើនេះ បើតាមប្រភពព័ត៌មានមួយបានបង្ហើបឱ្យដឹងថា កន្លងមកអ្នកបើកល្បែងកន្ទុយលេខនៅផ្សារប៉េសេនេះ គឺមានអ្នកកាសែតម្នាក់ជាអ្នកកាងការពារសម្របសម្រួលមិនឱ្យអាជ្ញាធរមានសមត្ថកិច្ចបង្ក្រាប រហូតដល់ថ្ងៃទី០៤ ខែតុលា ឆ្នាំ២០១៧ នេះ ទើបសមត្ថកិច្ចអាវុធហត្ថរាជធានីភ្នំពេញ ដោយមានការអនុញ្ញាតពីអយ្យការអមសាលាដំបូងចុះចាប់តែម្ដង ៕
