ដោយភ្ជាប់នឹងសេចក្តីជូនដំណឹងរបស់ក្រសួងការពារជាតិស្តីពីការទប់ស្កាត់ករណីបុគ្គលកេងចំណេញក្នុងដំណើរការជ្រើសរើសពលទាហាននោះ លោក ហ៊ុន ម៉ាណែត បានបង្ហោះសារលើបណ្ដាញហ្វេសប៊ុករបស់លោកកាលពីម្សិលមិញ ដោយស្នើឲ្យជួយផ្សព្វផ្សាយបន្ត ដើម្បីរួមគ្នាទប់ស្កាត់អំពើអសកម្មដែលអាចបង្កឡើងដោយបុគ្គលឆ្លៀតឱកាសមួយចំនួន។ក្នុងសារនោះ លោកឧត្តមសេនីយ៍ឯក បានអំពាវនាវឲ្យផ្តល់ព័ត៌មានទាក់ទងនឹងការឆ្លៀតឱកាសប្រព្រឹត្តិអំពើមិនប្រក្រតីទាក់ទងនឹងការជ្រើសរើសពលទាហាន ទៅកាន់លេខទូរស័ព្ទទាំង៦ ខ្សែដូចដែលគណៈកម្មការជ្រើសរើសពលទាហានបានប្រកាសក្នុងសេចក្តីជូនដំណឹង។
ពាក់ព័ន្ធនឹងការទារលុយពីបេក្ខជនប្រឡងចូលកងទ័ពនេះ មានបុរសចំនួន២នាក់ត្រូវបានតុលាការយោធាចាប់ខ្លួន រួមមាន វរៈសេនីយ៍ឯក ហេង រិទ្ធីនិង វរៈសេនីយ៍ត្រី ម៉ាន ម៉ាត់។ អ្នកទាំងពីរត្រូវបានចោទបានទារប្រាក់ពីបេក្ខជនក្នុងម្នាក់៥៥០ដុល្លារ។
ទាក់ទងនឹងការយកលុយជាថ្នូរនឹងការប្រឡងជាប់ចូលក្របខណ្ឌកម្លាំងប្រដាប់អាវុធនេះដែរ កាលពីខែកញ្ញាកន្លងទៅនេះ តុលាការខេត្តកំពង់ចាម បានបង្គាប់ឲ្យចាប់ខ្លួន កូនប្រុសលោកឧត្តមសេនីយ៍ផ្កាយ៣ ហែម ថេង ឈ្មោះ ហែម ចរិយា រួមទាំងព្រះសង្ឃមួយអង្គទៀត ដែលជាអ្នករត់ការពីបទឆបោករឿងទារលុយពីអ្នកចង់ចូលបម្រើការក្នុងក្របខណ្ឌនគរបាលជាតិ។ការចាប់ខ្លួននោះធ្វើឡើងតាមបណ្ដឹងរបស់ពលរដ្ឋចំនួន៣១នាក់ ដោយចោទមន្ដ្រីនគរបាលជាតិអន្ដោប្រវេសន៍ លោក ហែម ចរិយា ថា បានស៊ីដាច់ប្រាក់ប្រមាណជាង១៤ម៉ឺនដុល្លារ។
មាត្រា៣៥នៃច្បាប់ប្រឆាំងអំពើពុករលួយ ចែងថា អំពើប្រព្រឹត្តដោយរាជការសាធារណៈឬដោយពលរដ្ឋដែលទទួលអាណត្តិសាធារណៈ ដោយបានប្រើប្រាស់មុខងាររបស់ខ្លួនដើម្បីទទួលបានផលប្រយោជន៍ផ្ទាល់ខ្លួននឹងត្រូវផ្តន្ទាទោសដាក់ពន្ឋគារពី ២ឆ្នាំដល់៥ឆ្នាំនិងពិន័យជាប្រាក់ពី ៤លានរៀលទៅ ១០លានរៀល។សម្រាប់លោកស្រី ម៉ម ស៊ីថា ប្រធានគណៈកម្មការកម្ពុជាប្រឆាំងអំពើពុករលួយលើកជាយោបល់ថា ដើម្បីតម្លាភាពពិតប្រាកដគឺត្រូវបង្កើតគណៈកម្មាការចម្រុះមួយដែលមានភាពឯករាជ្យ មានការចូលរួមពីសង្គមស៊ីវិល និងអង្គភាពប្រឆាំងអំពើពុករលួយចូលរួមដំណើរជ្រើសរើសនេះ។លោកស្រីក៏ចង់ឃើញរដ្ឋត្រូវមានវិធានការជាក់ស្តែងទៅលើអ្នកប្រព្រឹត្តិអំពើពុករលួយជាជាងគ្រាន់តែជាការអំពាវនាវ៕អត្ថបទដកស្រង់ ទេព វណ្ណះ
