ចំណុចប្លែកភ្នែកមួយលើ Pixel 2 និង Pixel 2 XL ដែល Google ចេញម្សិលមិញនេះ ទាក់ទងនឹងការដករន្ធដោតកាសទំហំ 3.5mm ដូចកាលចេញ iPhone 7/7 Plus។ ប៉ុន្តែរឿងថ្មីមួយទៀត Google បានបង្ហាញកាសឥតខ្សែ Pixel Buds ដែលស្រដៀងនឹង AirPods របស់ Apple ហើយមានតម្លៃប្រហែលគ្នាគឺ ១៥៩ ដុល្លារ។
ទំនងជាមានមុខងារពិសេសច្រើនជាង AirPods ខណៈទាំងការរចនា Google បានបន្ថែមខ្សែភ្ជាប់ពិសេសមួយ វាត់ទៅក្រោយបរិវេណក ងាយស្រួលទុកដាក់និងការពារមិនឲ្យជ្រុះបាត់ដោយស្រួលៗ។ ទៀតសោតភ្ជាប់នូវមុខងារ Gesture Controls ដែលអ្នកប្រើអាចធ្វើឲ្យប្តូរបទ, បិទបើកសំឡេង ឬទទួលទូរសព្ទ ដោយគ្រាន់ប្រើកាយវិការអូសចុះឡើយ នៅលើតួកាស។ ស្ថិតក្នុងជម្រើសពណ៌ ៣ រួមមាន ខ្មៅ, ស និងខៀវ ហើយសាកមួយពេញម្តង អាចប្រើបានរយៈពេលជាង ៥ ម៉ោង។
មិនខុសពី AirPods កាស Pixel Buds ក៏មានភ្ជាប់មកជាមួយប្រអប់សាក ដែលអាចផ្ទុកថ្មដល់ 620mAh ផ្ដល់ឲ្យអ្នកប្រើកាសសាកស្ដាប់បានដល់ ២៥ ម៉ោង និងសាកបញ្ចូលតាមរយៈ USB-C។ គាំទ្រជាមួយការភ្ជាប់ទៅកាន់ស្មាតហ្វូនគ្រប់ម៉ូដែល ដែលដំណើរការលើ Android Marshmallow ឬខ្ពស់ជាងនេះ តាមរយៈមុខងារ Fast Pair។
ប្រភព៖ theverge