តារាភាគច្រើនចូលចិត្តទិញនំខួបកំណើតពីហាងល្បីៗ មានតម្លៃថ្លៃ និងច្នៃម៉ូដប្លែកៗ តម្រូវតាមកេរ្តិ៍ឈ្មោះល្បីរបស់ពួកគេ ប៉ុន្តែសម្រាប់តារាចម្រៀងល្បីឈ្មោះលោក សុគន្ធ ថេរ៉ាយុ ធ្វើខួបឆ្នាំនេះ លោកមិនបានចំណាយលុយទិញនំឡើយ គឺមានត្រឹមតែគ្រឿងម្ជូរពីរចាន ក៏លោកធ្វើឲ្យកម្មវិធីខួបបង្កើតឡើងនូវភាពរីករាយ និងមានការចាប់អារម្មណ៍ពីអ្នកគាំទ្រ។
លោក សុគន្ធ ថេរ៉ាយុ ប្រាប់ថា ខួបលោកឆ្នាំនេះលោកមិនបានធ្វើធំដុំទេ គឺគ្រាន់តែនាំមិត្តភ័ក្ដិទៅញ៉ាំអីនៅក្នុងហាងតិចតួចទេ ពោលគឺលោកក៏គ្មានបំណងទិញនំខួបមកកាត់ដែរ តែនៅពេលញ៉ាំអាហាររួចហើយ នៅក្នុងហាងគេមានថែមជូនគ្រឿងម្ជូរដោយមិនគិតថ្លៃ ពេលនោះ ខណៈដែលគេលើកគ្រឿងម្ជូរមក គេបានរៀបជានំតែម្តង គឺមានតែគ្រឿងម្ជូរពីរចាន និងទឹកជ្រលក់ដាក់នៅជាន់លើ ជាមួយនឹងទៀនតែម្តង។
លោកបន្តថា រូបភាពដែលមិត្តភ័ក្ដិរៀបចំនេះ លោកពិតជារីករាយខ្លាំងណាស់ ព្រោះមិននឹកស្មានថា លោកមិនបានទិញនំ ហើយមិត្តភ័ក្ដិក៏មិនឮអ្នកណាគ្រោងទិញនំមកធ្វើឲ្យលោកដែរ តែនៅពេលញ៉ាំអាហារ ពួកគេបែរជារៀបគ្រឿងម្ជូរធ្វើជានំខួបទៅវិញ គឺពុំធ្លាប់មានទេ សម្រាប់រូបលោក ហើយនំនេះ ទោះជាមិនបានចំណាយលុយ តែវាពិតជាមានន័យណាស់សម្រាប់មិត្តភាពពួកយើងដែលជាក្រុមការងាររួមគ្នា៕