ក្រុងម៉ាឌ្រីដ: លោក Antonio Conte អ្នកចាត់ការទូទៅរបស់ក្រុម Chelsea បានធ្វើការរិះគន់ក្រុមអ្នករៀបចំកម្មវិធីប្រកួតនៃក្របខ័ណ្ឌ Premier League ជុំវិញការមានពេលវេលាសម្រាកដ៏ខ្លីពីការប្រកួតក្របខ័ណ្ឌ Champions League នៅមុនពេលត្រូវជួបក្រុមកំពុងឡើងទម្រង់លេង Manchester City ក្នុងការប្រកួតរវាងក្រុមខ្លាំងដូចគ្នានៅរាត្រីថ្ងៃសៅរ៍នេះ។
ក្រុមរបស់លោក Conte បានបង្ហាញពីទម្រង់លេងយ៉ាងល្អ ដើម្បីធ្វើឲ្យក្រុម Atletico Madrid រងបរាជ័យក្នុងការប្រកួតក្របខ័ណ្ឌ Champions League លើទឹកដីខ្លួនឯងជាលើកទី ២ ក្នុងចំណោមការប្រកួត ២៤ លើកកាលពីថ្ងៃពុធ នៅពេលដែលខ្សែប្រយុទ្ធ Michy Batshuayi បានរកគ្រាប់បាល់ឈ្នះនៅនាទី ទី ៩៤ ដើម្បីជួយឲ្យពួកគេទទួលជ័យជម្នះក្នុងលទ្ធផល ២-១។
ទោះបីជាយ៉ាងណា គ្រូបង្វឹកសញ្ជាតិអ៊ីតាលីរូបនេះ បានរិះគន់ថា ការមានប្រៀបផ្សេងៗត្រូវបានផ្តល់ទៅឲ្យ Man City ដែលបានលេងកម្មវិធីប្រកួត Champions League នៅលើទឹកដីខ្លួនឯងជាមួយនឹងក្រុម Shakhtar Donetsk ក្នុងរយៈពេល ២៤ ម៉ោងមុននេះ កាលពីថ្ងៃអង្គារ។
លោក Conte បានឲ្យដឹងថា៖ «ខ្ញុំគិតថា យើងរងនូវការពិន័យបន្តិច ហើយក្នុងករណីនេះ វាពិតជាសំខាន់ណាស់ក្នុងការវិភាគ នៅមុនពេលធ្វើការសម្រេចចិត្ត»។
Man City កំពុងនាំមុខនៅលើកំពូលតារាងនៃក្របខ័ណ្ឌ Premier League ពីលើក្រុម Manchester United ដោយសារតែមានគ្រាប់បាល់ច្រើនជាង ខណៈដែល Chelsea កំពុងតែដេញតាមពីក្រោយ ៣ ពិន្ទុ ក្នុងចំណាត់ថ្នាក់លេខ ៣។
លោក Conte បានបញ្ជាក់ថា៖ «Man City គឺជាក្រុមដ៏ខ្លាំងមួយ។ ពួកគេកំពុងតែរកបានគ្រាប់បាល់ជាច្រើន ពួកគេកំពុងតែស្ថិតក្នុងស្ថានភាពដ៏ល្អទៅលើទម្រង់លេង ហើយយើងត្រូវតែត្រៀមលក្ខណៈឲ្យបានល្អសម្រាប់ការប្រកួតនេះ ពីព្រោះវាពិតជាសំខាន់ណាស់»។
គ្រូបង្វឹករូបបានប្រាប់បន្ថែមទៀតថា៖ «នៅមុនពេលធ្វើការសម្រេចចិត្ត អ្នកខ្លះត្រូវតែធ្វើការវិភាគឲ្យបានល្អទៅលើស្ថានភាពនេះ។ វានឹងមានការសម្រាកសម្រាប់ការប្រកួតអន្តរជាតិបន្ទាប់ពីចុងសប្តាហ៍នេះ។ ខ្ញុំភ្ញាក់ផ្អើល ដោយសារតែបញ្ហានេះ ពីព្រោះមានពេលវេលាជាច្រើនក្នុងការលេងការប្រកួតនេះខុសពីថ្ងៃសៅរ៍»។
លោក Conte ពិតជាពេញចិត្តទៅនឹងការបង្ហាញពីទម្រង់លេងរបស់ Chelsea ខណៈដែលពួកគេបានធ្វើការវាយបកយ៉ាងល្អដើម្បីទទួលបាន ៣ ពិន្ទុពេញលើទឹកដីក្រុម Atletico៕
