កីឡាករជើងខ្លាំងជួរមុខរបស់កម្ពុជា ផល សោភ័ណ្ឌ សម្រាប់ការប្រកួតនៅស្អែកនេះបានត្រៀមខ្លួនរួចហើយ ដើម្បីតតាំងជាមួយកីឡាករជើងខ្លាំងឆ្លងដែនមកប្រទេសថៃ ប៉ុន្តែលទ្ធផលយ៉ាងណានោះមិនទាន់ហ៊ានថាមុននោះទេ។
ផល សោភ័ណ្ឌ បានឲ្យដឹងថា បើនិយាយពីហ្វឹកហាត់ត្រៀមការប្រកួតស្អែកនេះ រួបគេបានហាត់ត្រឹមត្រូវល្អហើយ ទាំងកម្លាំងនិងបច្ចេកទេស បើទោះជាត្រូវប្រកួត៣ទឺក ឬបន្ថែម៥ទឹកទៀតក៏ដោយមិនថ្វីដែរ។ និយាយពីដៃគូដែលនឹងត្រូវឡើងប្រកួតម៉ារ៉ាតុងស្អែកនេះ សោភ័ណ្ឌ ក៏បានមើលពីស្នៀតប្រយុទ្ធរបស់ពួកគេកន្លងផងដែរ ឃើញថាអ្នកប្រដាល់ថៃទាំងពីរនាក់នេះមិនធម្មតានោះទេ ម្នាក់ធ្លាប់ស្មើ ឡៅ ចន្រ្ទា និងម្នាក់ទៀតមិនធ្លាប់ចាញ់នៅកម្ពុជានោះទេ។
អតីតកីឡាករជម្រើសជាតិផ្នែកសកលខាងលើបន្ថែមទៀតថា ស្អែកនេះឡើងទៅដឹងតែប្រកួតអស់ពីសមត្ថភាពហើយ លទ្ធផលយ៉ាងណាចាំមើលជាក់ស្ដែង ប៉ុន្តែដឹងតែខំប្រឹងប្រកួតអស់លទ្ធភាពតែម្ដង។ សោភ័ណ្ឌ សូមថ្លែងអំណរគុណដល់អ្នកគាំទ្រខ្លួនទាំងអស់ដែលតែងតែលើកទឹកចិត្តជានិច្ច មិនថាពេលប្រកួតចាញ់ ឬឈ្នះទេក៏ពួកគេនៅតែជួយលើកទឹកចិត្ត។
ម៉ៃសុទ្ធ ប៉េឡេប៊ូរីរ៉ាំ(ថៃ)កាលស្មើ ឡៅ ចន្រ្ទា
សម្រាប់ការប្រកួតកម្មវិធីម៉ារ៉ាតុងរបស់សង្វៀន CNC ស្អែកនេះនឹងចាប់ផ្ដើមឡើងវេលាម៉ោង ៦ល្ងាចតទៅ ដោយមានកីឡាករកម្ពុជា២រូប និងថៃ២រូប។ គូទី១ ថុល មករា ប៉ះ ទួបប៉េ ឆ.ឆើតឆ័យ(ថៃ) និងគូទី២ ផល សោភ័ណ្ឌ ប៉ះ ម៉ៃសុទ្ធ ប៉េឡេប៊ូរីរ៉ាំ(ថៃ) កីឡាកររូបណាឈ្នះនឹងឡើងទៅវគ្គផ្ដាច់ព្រ័ត្រយកលុយ ៤លានរៀលតែម្ដង៕
