ពេលលោកមកដល់កម្ពុជាភ្លាម សម្តេចព្រះនរោត្តម សីហនុ បានតែងតាំងលោកជាស្ថាបត្យករជាតិ ហើយលោកបានរចនាប្លង់ និងកសាងសមិទ្ធផលសាធារណៈជាច្រើននៅក្នុងសម័យសង្គមរាស្រ្តនិយម ដែលគេចាត់ទុកថានេះជាផ្នែកមួយនៃទំនើបកម្មក្នុងសម័យនោះ។
ក្រៅពីការងាររាជការ លោកក៏បានរចនា និងសង់ផ្ទះសម្រាប់ឯកជន និងគម្រោងតូចៗផ្សេងទៀតផងដែរនៅពេលនោះ។ សំណង់របស់លោកដែលបន្សល់ទុកដល់បច្ចុប្បន្នមានដូចជាស្តាតអូឡាំពិក អគារក្នុងសាកលវិទ្យាល័យភូនមិន្ទភ្នំពេញ និងអគារវិទ្យាស្ថានភាសាបរទេស និងសាលមហោស្របចតុមុខជាដើម។
(លោក វណ្ណ ម៉ូលីវណ្ណ ថតកាលឆ្នាំ១៩៥៨)
ក្រោយរដ្ឋប្រហារឆ្នាំ១៩៧០ លោក វណ្ណ ម៉ូលីវណ្ណ បានចាកចេញពីកម្ពុជាទៅរស់នៅប្រទេសស្វីស និងបាន ធ្វើការជាមួយស្ថាប័នសិទ្ធិមនុស្សរបស់ង្គការសហប្រជាជាតិនៅតាមប្រទេសកំពុងអភិវឌ្ឍន៍មួយចំនួន។លោកបានវិលមកកម្ពុជាវិញនៅឆ្នាំ១៩៩១ និងបានទទួលការតែងតាំងជារដ្ឋមន្ត្រីក្រសួងវប្បធម៌ ហើយលោកក៏ជាស្ថាបនិកម្នាក់ចូលរូមបង្កើតអាជ្ញាធរជាតិអប្សរា។ នេះបើតាមការចុះផ្សាយរបស់គេហទំព័រគម្រោងវណ្ណ ម៉ូលីវណ្ណ។ លោកបានរស់នៅខេត្តសៀមរាប និងស្លាប់នៅទីនោះ ។
បើតាមអគ្គនាយករងអាជ្ញាធរជាតិអប្សរា ឯកឧត្តម ហង្ស ពៅ ដែលស្និទ្ធនឹងគ្រួសារលោក វណ្ណ ម៉ូលីវណ្ណ នៅព្រឹកនេះថា លោក វណ្ណ ម៉ូលីវណ្ណ បានស្លាប់ហើយនៅព្រឹកថ្ងែទី២៨ ខែកញ្ញានេះដោយជំងឺចាស់ជរាដែលមិនអាចព្យាបាលបាន។ បើតាមឯកឧត្តម ហង្ស ពៅ សពលោក វណ្ណ ម៉ូលីវណ្ណ នឹងត្រូវតម្កល់ទុកធ្វើបុណ្យនៅវត្តស្ទឹង និងថាគណៈកម្មការរៀបចំបុណ្យជាតិ និងអន្តរជាតិជាអ្នករៀបចំពិធីបុណ្យសពនេះ។
រូបភាព៖ គម្រោងវណ្ណ ម៉ូលីវណ្ណ
