ផ្អែកតាមរបាយការណ៍ស្រាវជ្រាវថ្មីមួយចេញពី Localytics បានបង្ហាញថា នៅសប្ដាហ៍ដំបូងចំនួនតួលេខលក់ចេញ iPhone 8/8 Plus បូកបញ្ចូលគ្នាបានត្រឹម ០.៧ ភាគរយ នៃចំណែកទីផ្សារ iPhone សរុប ដែលភាគរយនេះនៅទាបជាងជំនាន់ iPhone 5s ចេញលក់នៅឆ្នាំ ២០១៣ ថែមទៀតផង។
បើគិតទីផ្សារ iPhone ពីឆ្នាំ ២០១៣ ដល់ ២០១៦ នាសប្ដាហ៍ដំបូងដូចគ្នា សន្ទុះនៃការចាប់អារម្មណ៍មានការពេញចិត្តខ្ពស់ជាងនេះ។
ប្រភពខាងលើបានលើកឡើងពីហេតុផលចម្បងពីរសម្រាប់ធ្លាក់ចុះនេះទី ១ អាចមកពីអតិថិជនចង់សាកល្បងបទពិសោធន៍ថ្មីលើ iPhone X ដែលនឹងចេញលក់នៅខែវិច្ឆិកា និងទី ២ មកពីកំណើនអ្នកប្រើប្រាស់ iPhone កើនឡើងបន្តបន្ទាប់ជារៀងរាល់ឆ្នាំរួចមកហើយ បែបនេះមានភាគរយតិចបំផុតដែលអ្នកខ្លះប្ដូរឡើងស៊េរីថ្មី។
យ៉ាងណា iPhone 8 Plus ទទួលបាន ០.៤ ភាគរយ ខ្ពស់ជាងត្រកូល Plus ណាៗទាំងអស់។ បច្ចុប្បន្ន Apple មិនទាន់បង្ហើបតួលេខចេញលក់ច្បាស់ការនៅឡើយទេ តែក៏ពុំមានន័យថា Apple បរាជ័យលើទីផ្សារ iPhone នោះទេ។
រំឮកថាចំពោះ iOS 11 គិតត្រឹម ៦ ថ្ងៃដំបូង បើកឲ្យប្រើប្រាស់ មានអ្នកអាប់ដែតទៅជំនាន់នោះតែ ២២ ភាគរយប៉ុណ្ណោះទាបជាងឆ្នាំទៅ iOS 10 មានដល់ ២៦ ភាគរយ និង iOS 9 មានដល់ ៣១ ភាគរយ។
ប្រភព៖
idropnews
