នៅវេលាម៉ោង០៨:៣០នាទី ថ្ងៃទី១៩ ខែកញ្ញា ឆ្នាំ២០១៧ ក្រុមការងារសាលារាជធានីភ្នំពេញ ដឹកនាំដោយ ឯកឧត្តម ស៊ុយ សេរិទ្ធ អភិបាលរងរាជធានីភ្នំពេញ លោក សុខ ពេញវុធ អភិបាលខណ្ឌដូនពេញ លោក គាត រង្សី ប្រធានមន្ទីរបរិស្ថានរាជធានីភ្នំពេញ លោក សាយ ចន្ថា ចៅសង្កាត់ចតុមុខ និងមន្ត្រីក្រោមឱវាទ ព្រមទាំងកំលាំងប្រជាការពារខណ្ឌចំនួន៣១នាក់ ម៉ូតូដឹកសំរាមចំនួន០២គ្រឿង រថយន្តគណៈបញ្ជាការឯកភាពខណ្ឌចំនួន០៣ គ្រឿង បានជួបជុំគ្នានៅខាងលិចវិមានឯករាជ្យ ស្ថិតក្នុងភូមិសាស្ត្រសង្កាត់ចតុមុខដើម្បីបែងចែកកំលាំងចុះពិនិត្យទីតាំងដែលកកស្ទះសំរាមអំឡុុងថ្ងៃបុណ្យភ្ជុំបិណ្ឌនៅក្នុងមូលដ្ឋានខណ្ឌដូនពេញ ដើម្បីរកដំណោះស្រាយឲ្យទាន់ពេលវេលា និងធានាមិនមានសម្រាមកកស្ទះក្នុងឱកាសបុណ្យភ្ជុំបិណ្ឌរយះពេល០៣ថ្ងៃនេះ។
ក្នុងអំឡុងពេលនេះ លោក អភិបាលខណ្ឌ បានសំណូមពរពុកម៉ែបងប្អូនប្រជាពលរដ្ឋក្នុងមូលដ្ឋានទាំងអស់ សូមមេត្តាកុំបញ្ចេញសំរាមពីផ្ទះខុសម៉ោង និងមិនគួរបញ្ចេញសំរាមមកក្រៅផ្ទះឡើយ គឺគួរបានរង់ចាំចប់ថ្ងៃបុណ្យសិន ទើបបញ្ចេញ ព្រោះអំឡុងពេលនេះបុគ្គលិកក្រុមហ៊ុនស៊ិនទ្រីមួយចំនួនធំ បានឈប់សំរាកទៅស្រុកកំណើតរហូតដល់ចប់ថ្ងៃបុណ្យទើបមានបុគ្កលិកចូលបំពេញការងារគ្រប់ចំនួនវិញ៕អត្ថបទ ទេព វណ្ណះ
