បាល់ទាត់៖ នៅថ្ងៃចន្ទដើមសប្ដាហ៍ម្សិលម៉ិញនេះគ្រូបង្វឹកក្លឹប Atletico Madrid លោក Diego Simeone បានដឹកនាំកូនក្រុមរបស់ខ្លួនធ្វើការហ្វឹកហាត់ ដើម្បីត្រៀមជួបជាមួយក្រុម AS Roma របស់អ៊ីតាលីនារាត្រីថ្ងៃអង្គារនេះ។
នេះជាការប្រកួតដំបូងក្នុងពូល C នៃក្របខណ្ឌ UEFA Champions League រដូវកាល 2017/2018 ខណៈក្រុម Atletico Madrid និងត្រូវធ្វើដំណើរទៅកាន់ទឹកដីអ៊ីតាលី។
ក្រោយពីបានដឹកនាំកូនក្រុមហ្វឹកហាត់រួចហើយ គ្រូបង្វឹកដែលទើបបានចុះហត្ថលេខាបន្តការងារនៅអេស្ប៉ាញជាមួយ AT Madrid 2ឆ្នាំទៀតនេះបានលើកឡើងថា យើងបំភ្លេចអ្វីៗទាំងអស់ដើម្បីចាប់ផ្ដើមរដូវកាលថ្មីនៅទីនេះ ភាពសោកសៅសោកសង្រេងបានរលាយទៅហើយ មានតែការចាប់ផ្ដើមថ្មីតែប៉ុណ្ណោះដើម្បីឆ្ពោះទៅរកឧត្ដមភាពក្លឹប។
រំលឹកដែរថា សម្រាប់លោក Simeone ដែលធ្លាប់ជាអតិតកីឡាករអាហ្សង់ទិនរូបនេះ បានក្លាយជាគ្រូបង្វឹកក្លឹប AT Madrid ៧រដូវកាលជាប់ៗគ្នា និងស្ថិតជាតំណែងគ្រូដឹកនាំបានយូរជាងគេនៅលីហ្គកំពូលអេស្ប៉ាញបច្ចុប្បន្នផងដែរ។ គួរបញ្ជាក់ថា ក្លឹប AT Madrid បានឡើងទៅវគ្គផ្ដាច់ព្រ័ត្រ UEFA Champions League ចំនួន 2លើកក្នុងរយៈពេល ៣រដូវកាលប៉ុន្តែសុទ្ធសឹងតែចាញ់ក្រោមថ្វីដៃក្រុម Real Madrid រហូត៕
