![logoblog](https://3.bp.blogspot.com/-h2g5wrjCTDw/Wz3E6ocavYI/AAAAAAAABH8/nOqtyDL2VnEF_HmhZyjlu59zWRS8t7ZNwCLcBGAs/s1600/blogger.png)
Crystal Palace បណ្ដេញគ្រូបង្វឹកចេញពីតំណែង ក្រោយចាប់ផ្ដើមរដូវកាលអាក្រក់បំផុតរយៈពេលជិត ១០០ឆ្នាំ
បញ្ចូលដោយ៖ Laiheang Vobfm - 12/09/2017បាល់ទាត់៖ ក្លឹបអង់គ្លេស Crystal Palace បានសំរេចបណ្ដេញគ្រូបង្វឹកលោក Frank de Boer ចេញពីតំណែងហើយ បន្ទាប់ពីដឹកនាំក្រុមចាប់ផ្ដើមរដូវកាលអាក្រក់បំផុតរយៈពេល ១០០ឆ្នាំមិនធ្លាប់មាន។
អតិតគ្រូបង្វឹកក្លឹបហូឡង់ Ajax Amsterdam វ័យ ៤៧ឆ្នាំរូបនេះបានចូលកាន់ការជាគ្រូបង្វឹកនៅ Crystal Palace ទើបតែបាន ១០សប្ដាហ៍ប៉ុណ្ណោះ និងរងបរាជ័យរាល់បួនប្រកួតដែលលោកដឹកនាំបើករដូវកាកថ្មី English Premier League នេះ។
ការបណ្ដេញចេញពីតំណែងនេះធ្វើអោយលោក Frank de Boer ជាប់កំណត់ត្រាគ្រូបង្វឹកដែលដឹកនាំនៅ Premier League រយៈពេលខ្លីបំផុត។
បរាជ័យចុងក្រោយកាលពីថ្ងៃអាទិត្យនៅផ្ទះ Burnley ក្រុមរបស់លោក Frank de Boer មានឱកាសច្រើនតែសុទ្ធតែខ្ជះខ្ជាយនៅមុខទី ធ្វើអោយ Crystal Palace ធ្លាក់ទៅបាតតារាងមិនទាន់ស៊ុតចូលទីក្រុមណាមួយបាននៅឡើយ។
រំលឹកថា ក្រុមនៅអង់គ្លេសចុងក្រោយដែលបរាជ័យបួនប្រកួតដំបូងគឺ Preston North End តាំងពីឆ្នាំ១៩២៤។ ជ័យជំនះមួយប្រកួតគត់ដែលលោក Frank de Boer ដឹកនាំឈ្នះគឺនៅ League Cup ឈ្នះ Ipswich Town ក្រៅពីនោះមានចាញ់ថ្ងៃបើករដូវកាលក្រោមថ្វីជើងក្រុមភ្ញៀវឡើងថ្មី Huddersfield Town ៣-០ ចាញ់ Swansea ២-០ ក្នុងផ្ទះ និងចាញ់ក្រៅផ្ទះក្រោមថ្វីជើង Liverpool និង Burnley។ មានសារព័ត៌មានអង់គ្លេសមួយចំនួនចុះផ្សាយថាអតិតគ្រូបង្វឹកអង់គ្លេស Roy Hodgson អាចនឹងជំនួសកៅអីដែលទំនេរ៕