ក្រោយកើតហេតុប្រជាពលរដ្ឋក្បែរនោះបានទំនាក់ទំនងហៅរថយន្តសង្គ្រោះរបស់មន្ទីរពេទ្យបង្អែកខេត្តនាំទៅសង្គ្រោះបន្ទាន់ តែដោយសាររង់ចាំរថយន្តយឺតយ៉ាវ ជនរងគ្រោះជានិស្សិតពេទ្យត្រូវរន្ទះបាញ់ និងគ្រោះថ្នាក់ចរាចរណ៍មួយជាន់ទៀតនោះដាច់ខ្យល់ស្លាប់នៅនឹងកន្លែងចំណែកជនរងគ្រោះពីរនាក់ទៀតត្រូវប្រជាពលរដ្ឋដឹកទៅសង្គ្រោះនៅមន្ទីរពេទ្យ។ ក្រោយពេលកើតហេតុភ្លាមនោះមន្ត្រីចរាចរណ៍ជើងគោកស្នងការដ្ឋាននគរបាលខេត្តស្ទឹងត្រែងបានមកសម្រួលចរាចរណ៍ និងវាស់វែងធ្វើកំណត់ហេតុ ព្រមទាំងស្រាវជ្រាវអត្តសញ្ញណជនរងគ្រោះទាំងអស់ផងដែរ។
មន្ត្រីនគរបាលចរាចរណ៍ជើងគោកឲ្យដឹងថា គ្រោះថ្នាក់ចរាចរណ៍ខាងលើគឺផ្តើមដំបូងឡើយជនរងគ្រោះឈ្មោះ ភួយ ណារឹម ភេទប្រុស អាយុ២២ឆ្នាំ ជានិស្សិតពេទ្យជំនាន់ទី២ មានទីលំនៅឃុំកាឡែង ស្រុកលំផាត់ ខេត្តរតនគិរីកំពុងសិក្សានៅសាលាមធ្យមសិក្សាសុខាភិបាលភូមិភាគខេត្តស្ទឹងត្រែង ត្រូវបានរន្ទះបាញ់ខណៈកំពុងបើកបរម៉ូតូក្នុងគោលដៅពីជើងទៅត្បូងបណ្តាលឲ្យរេចង្កូតទៅបុកម៉ូតូមួយគ្រឿងទៀតមកពីមុខរងរបួសធ្ងន់និងស្លាប់ក្រោយកើតហេតុបន្តិច។
ចំណែកជនរងគ្រោះពីរនាក់ទៀតស្ថិតក្នុងហេតុការណ៍នោះដែរម្នាក់ឈ្មោះ ភឿន វេន ភេទប្រុស អាយុ៤៥ឆ្នាំ និងម្នាក់ទៀតឈ្មោះ សុខ ឌឿន ភេទស្រី អាយុ៤២ឆ្នាំ អ្នកទាំងពីរជាប្តីប្រពន្ធនឹងគ្នារស់នៅភូមិចង្ក្រង ឃុំកសាង ស្រុកចិត្របុរី ខេត្តក្រចេះ រងរបួសធ្ងន់។ ចំណែកម៉ូតូរងការខូចខាតទាំងសងខាង បច្ចុប្បន្ននាំយកទៅរក្សាទុកនៅការិយាល័យចរាចរណ៍ជើងគោកស្នងការដ្ឋាននគរបាលខេត្តស្ទឹងត្រែងរង់ចាំការដោះស្រាយតាមនីនិវិធី៕ អត្ថបទ:ទេព វណ្ណះ
