ប្រភពព័ត៌មានបានឱ្យដឹងថា អស់រយ:ពេលជាច្រើនថ្ងៃកន្លងមកហើយគេសង្កេតឃើញប្រជាពលរដ្ឋរស់នៅភូមិជាច្រើន ដែលទំនេរពីការងារស្រែចម្ការបាននាំគ្នាយកដែកស្បែងកាំបិត និងចបជីក ទៅអង្គុយជីកកកាយដី ដែលសេសសល់តិចតួចពីជនជាតិថៃជីកកាយកាលពីសម័យសង្គ្រាម ដោយគ្រួសារខ្លះបានវេចបាយកញ្ចប់ដាក់ថង់ អ្នកខ្លះទៀតដាក់ធុង យកទៅអង្គុយហូបជួបជុំគ្រួសារ ហើយនាំគ្នាខិតខំប្រឹងប្រែងជីកដីតាំងពីព្រឹករហូតដល់ពេលល្ងាចទើបត្រឡប់មកផ្ទះវិញ ក៏បានកំទេចត្បូង លក់ឱ្យឈ្មួញ បានប្រាក់ទិញម្ហូបអាហារផ្គត់ផ្គង់ជីវភាពគ្រួសារ ។
សូមបញ្ជាក់ផងដែរថា កន្លែងដែលប្រជាពលរដ្ឋនាំគ្នាជីកកកាយដីរែងរករ៉ែត្បូងនេះ គឺជាដីភ្នំដែលជនជាតិថៃបានយកគ្រឿងចក្រទៅជីកកកាយដីរ៉ែងយករ៉ែត្បូងដឹកទៅស្រុកគេអស់កាលពីសម័យសង្គ្រាមលុះឃើញនៅសេសសល់តិចតួចទើបពួកគាត់នាំគ្នាទៅអង្គុយជីកកកាយរកកំទេចរ៉ែត្បូងបានតិចតួចតែម្តង ៕ អត្ថបទ: ទេព វណ្ណះ
