លោក ខេង ស្រេង អធិការនគរបាលស្រុកចំការលើ បានឱ្យដឹងថា ក្រោយពីកើតហេតុ កម្លាំងសមត្ថកិច្ចបានសហការជាមួយប្រជាការពារភូមិសហគ្រាន់ ឃុំចំការអណ្តូង ស្រុកចំការលើ បានធ្វើការឃាត់ខ្លួនជនសង្ស័យម្នាក់ឈ្មោះ ស៊ឹម រឹម ភេទប្រុស អាយុ៤៦ឆ្នាំ ជនជាតិខ្មែរ ស្នាក់នៅភូមិ-ឃុំកើតហេតុខាងលើ ដែលបានយកកាំបិតកាចែត កាប់ទៅលើប្រពន្ធរបស់ខ្លួនឈ្មោះ ឈិត ចាន់ធូ អាយុ៤៨ឆ្នាំ ជនជាតិខ្មែរ បណ្តាលឱ្យរងរបួសកញ្ចឹងកផ្នែកខាងឆ្វេងមួយកន្លែង។
លោកអធិការបានបញ្ជាក់ថា នៅថ្ងៃកើតហេតុ បុរសជាប្តីបានទៅចៀរជ័រ ពេលត្រឡប់មកវិញបានសួររកបាយហូប តែប្រពន្ធកំពុងតែលេងបៀមិនបានគិតគូរពីរឿងបាយទឹកសោះ ក៏ឈ្លោះប្រកែកគ្នា ហើយបុរសជាប្តីខឹងបានយកកាំបិតកាប់លើប្រពន្ធជាជនរងគ្រោះតែម្តង។ ក្រោយពេលកើតហេតុ សមត្ថកិច្ចបានឃាត់ខ្លួនជនសង្ស័យខាងលើ នាំមកអធិការដ្ឋាននគរបាលស្រុកចំការលើ ដើម្បីកសាងសំណុំរឿងតាមនីតិវិធី៕ អត្ថបទ: ទេព វណ្ណះ
