យោធារុស្ស៉ីប្រចាំតំបន់ភាគខាងត្បូង ធ្វើសមយុទ្ធយោធា ៣,០០០លើក ក្នុងឆ្នាំ២០១៨

(ម៉ូស្គូ)៖ កងកម្លាំងយោធារុស្ស៉ីនៃតំបន់ភាគខាងត្បូង បានដឹកនាំការធ្វើសមយុទ្ធយោធាច្រើនជាង៣,០០០លើក ក្នុងឆ្នាំ២០១៨ នេះ ពោលគឺច្រើនជាង២ដងបើធៀបទៅនឹងឆ្នំា២០១៧។ នេះបើមេបញ្ជាការលោក Alexander Dvornikov ដកស្រង់ដោយ ទីភ្នាក់ងារសារព័ត៌មានចិនស៉ីនហួរ នៅថ្ងៃពុធ ទី២៨ ខែវិច្ឆិកា ឆ្នាំ២០១៨។

មេបញ្ជាការកងកម្លាំងយោធារុស្ស៉ី នៃតំបន់ភាគខាងត្បូង លោក Alexander Dvornikov បានប្រាប់សារព័ត៌មាននៅក្នុងស្រុក នៅថ្ងៃពុធនេះទៀតថា ការធ្វើសមយុទ្ធយោធាផ្លូវគោក ផ្លូវអាកាស និងផ្លូវទឹកក៏បានកើនឡើងបីដងផងដែរ ខណៈយន្ដហោះ ចម្បាំង និងឧទ្ធម្ភាគចក្រចំនួន៦០០០គ្រឿងបានចូលរួមធ្វើសមយុទ្ធយោធាក្នុងឆ្នាំ២០១៨នេះ។

សូមបញ្ជាក់ថា៖ បើតាមលោក Dvornikov ការចែករំលែកបទពិសោធន៍ និងអាវុធទំនើបៗសម្រាប់កងកម្លាំងយោធាតំបន់ភាគ ខាងត្បូង បានកើនឡើង៦៥ភាគរយ។ កងកម្លាំងយោធាភាគខាងត្បូង គឺជាអង្គភាពយោធាមួយក្នុងចំណោម៥របស់កងទ័ពរុស្ស៊ី និងមានមូលដ្ឋាននៅទីក្រុង Rostov-on-Don៕