ប្រធានាធិបតីប៉ូឡូញ ដែលបានបំពេញទស្សនកិច្ចនៅក្រុងវ៉ាស៊ីនតោន ដោយបានជួបនឹងលោកប្រធានាធិបតីដូណាល់ ត្រាំ បានថ្លែងឲ្យដឹងថា រដ្ឋាភិបាលប៉ូឡូញ ត្រៀមខ្លួនចំណាយ២ពាន់លានដុល្លារ បើសិនជាអាមេរិក ព្រមកសាងមូលដ្ឋានកងទ័ព លើដីប៉ូឡូញ។ នេះជាសំណើសុំចូលរួមការចំណាយ ដែលលោកដូណាល់ ត្រាំ តែងតែនិយាយរន្ធាន់ ថាឲ្យប្រទេសផ្សេងទៀត ត្រូវចូលរូម បើសិនជាចង់ឲ្យកងទ័ពអាមេរិកនៅជួយចាំការពារ។ បំណងរបស់ប៉ូឡូញ ឲ្យមានវត្តមានកងទ័ពអាមេរិកលើដីខ្លួន គឺដោយសារខ្លាចសកម្មភាពវាទទីរបស់រុស្ស៊ី។
ប៉ូឡូញ ត្រៀមខ្លួន សុខចិត្តចូលរួមឲ្យបានច្រើនបំផុត តាមតែអាចធ្វើបាន ក្នុងការចំណាយទៅលើដំណើរការនៃមូលដ្ឋានកងទ័ពអាមេរិកជាអចិន្ត្រៃយ៍ នៅលើទឹកដីប៉ូឡូញ។ នេះគឺជាសម្តីរបស់លោកដូណាល់ ត្រាំ មុនពេលជួបប្រជុំជាមួយលោក Andrzej Duba ប្រធានាធិបតីប៉ូឡូញ នៅសេតវិមាន។ ក្រោយកិច្ចប្រជុំ នៅចំពោះមុខអ្នកកាសែត ប្រធានាធិបតីទាំង២បានប្រកាសថា ប៉ូឡូញអាចចូលរួមចំនួន២ពាន់លានដុល្លារ ហើយរដ្ឋាភិបាលអាមេរិក កំពុងពិចារណាឲ្យបានល្អិតល្អន់ លើសំណើនេះ។
លោកដូណាល់ ត្រាំ បានឆ្លៀតបញ្ជាក់ថា ក្រុងការងារនឹងពិចារណា ជាបឋមដោយផ្អែកលើវិស័យសន្តិសុខយោធា និងបន្ទាប់មកទៀត គឺថ្លៃចំនាយ។ ប៉ុន្មានម៉ោងក្រោយមក នៅក្នុងលិខិតមួយរបស់សេតវិមាន បានសរសេរថា រដ្ឋាភិបាលអាមេរិក មានបំណងពង្រឹង ពង្រីងតួនាទីការពារសន្តិសុខស្ថិរភាព នៅលើទឹកដីប៉ូឡូញ ហើយរដ្ឋាភិបាល កំពុងពិចារណា យ៉ាងម៉ដ្ឋចត់ ថាតើគំរោងនេះ អាចធ្វើទៅបានដែរឬទេ។ លិខិតនេះបន្តថា លទ្ធផលវិជ្ជមាននៃកិច្ចប្រឹងប្រឹងផ្នែកយោធានេះ គឺមិនមែនមានសម្រាប់តែអឺរ៉ុបកណ្តាល និងអឺរ៉ុបខាងកើតប៉ុណ្ណោះទេ តែវានឹងនាំផលល្អ ដល់ចំណងសម្ព័ន្ធមិត្តអង្គការអូតង់ទាំងមូលតែម្តង។
យ៉ាងណាមិញ លោក Jim Mattis រដ្ឋមន្ត្រីក្រសួងការពារជាតិប៉ូឡូញ បានចេញមុខអបអរ និងសរសើររដ្ឋាភិបាលប៉ូឡូញ ដែលបានស្នើសុំចូលរួមការចំណាយ។ តែយ៉ាងណាក៏ដោយរដ្ឋមន្ត្រីអាមេរិករូបនេះ បានលើកឡើងថា នៅមានចំណោទច្រើនណាស់ ដែលត្រូវដោះស្រាយ ព្រោះថា មិនមែនគ្រាន់តែជាមូលដ្ឋានទ័ពសាមញ្ញទេ តែគឺជាគំរោងសាងសង់មូលដ្ឋានទ័ព បូកបន្ថែមនឹងហេដ្ឋារចនាសម្ព័ន្ធហ្វិកហាត់របស់ទាហាន និងហេដ្ឋារចនាសម្ព័ន្ធជួលជុលថែទាំសម្ភារៈសព្វាវុធថែមទៀតផង។
