ការអបអរសាទរនេះ បានធ្វើឡើងក្នុងពេល លោក តារ៉ូ កូណូ ចូលជួបសម្តែងការគួរសម និងពិភាក្សាការងារមួយចំនួនជាមួយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជានៅទីក្រុងហាណូយ ប្រទេសវៀតណាម នៅរសៀលថ្ងៃទី១២ ខែកញ្ញា ឆ្នាំ២០១៨នេះ។
សម្តេចតេជោ ហ៊ុន សែន បានមានប្រសាសន៍រៀបរាប់ពីការរៀបចំក្បាលម៉ាស៊ីនដឹកនាំរដ្ឋសភា និងរាជរដ្ឋាភិបាលថ្មី។
សម្តេចតេជោ បានគូសបញ្ជាក់ថា មកដល់ពេលនេះស្ថានភាពក្នុងប្រទេសកម្ពុជាមានភាពល្អប្រសើរជាងពេលណាៗទាំងអស់ ពោលគឺស្ថេរភាពនយោបាយ ស្ថេរភាព ម៉ាក្រូសេដ្ឋកិច្ច មិនតែប៉ុណ្ណោះក្រោមគំនិតផ្តួចផ្តើមដោយផ្ទាល់ពីសម្តេច កម្ពុជាបានបង្កើតឡើងនូវវេទិកាពិភាក្សា ដែលមានការចូលរួមពីគណបក្សនយោបាយ ក្នុងការបោះឆ្នោតសកលឆ្នាំ២០១៨ ដើម្បីឈានទៅបង្កើតឧត្តមក្រុមប្រឹក្សាពិគ្រោះ និងផ្តល់យោបល់ ដើម្បីលើកបញ្ហាមួយចំនួន ដែលទាក់ទិនទៅនឹងដំណើរការរបស់រាជរដ្ឋាភិបាល។
សម្តេចតេជោនាយករដ្ឋមន្រ្តី តាមរយៈលោករដ្ឋមន្រ្តីការបរទេសជប៉ុន បានថ្លែងអំណរគុណជូនចំពោះលោក ស៊ិនហ្សូ អាបេ ដែលបានគោរពអញ្ជើញសម្តេចបំពេញទស្សនកិច្ច និងអញ្ជើញចូលរួមកិច្ចប្រជុំកំពូលមេគង្គ-ជប៉ុន នៅពេលខាងមុខ ពិសេសអញ្ជើញទៅចូលរួមទស្សនកិច្ចនៅ ទីក្រុងយូកូហាម៉ា ដែលជាមូលដ្ឋាននៃការបោះឆ្នោតរបស់ឯកឧត្តមរដ្ឋមន្រ្តីការបរទេសជប៉ុន៕
