ជប៉ុន ដំឡើងកម្រិតប្រកាសអាសន្ននៃភ្នំភ្លើង Shindake នៅភាគខាងត្បូងប្រទេស និងត្រៀមជម្លៀសខ្លួនប្រជាជនចេញ
15/08/2018
(តូក្យូ)៖ នាថ្ងៃពុធនេះ អាជ្ញាធរជប៉ុន បានដំឡើងកម្រិតប្រកាសអាសន្ន សម្រាប់ភ្នំភ្លើងលើកោះតូចមួយ នៅភាគខាងត្បូងប្រទេស ដែលជាសញ្ញាបង្ហាញថា ប្រជាជនរស់នៅទីនោះ គួរតែត្រៀមលក្ខណៈសម្រាប់ការជម្លៀសខ្លួន ទោះបីជាហេតុការណ៍ផ្ទុះជាក់ស្តែងនៅលើកំពូលភ្នំភ្លើង ពុំទាន់ត្រូវបានប្រទះឃើញយ៉ាងណាក្តី។ នេះបើតាមការដកស្រង់ការផ្សាយចេញពីសារព័ត៌មាន Channel News Asia នៅព្រឹកថ្ងៃពុធ ទី១៥ ខែសីហា ឆ្នាំ២០១៨។
ទីភ្នាក់ងារឧតុនិយមជប៉ុន បានឲ្យដឹងថា សកម្មភាពរំញ័រនិងការបញ្ចេញឧស្ម័ន បានកើនឡើងខុសពីធម្មតា ចំពោះភ្នំភ្លើងស៊ីនដាកេ (Shindake) នៃកោះគូជីណូរ៉ាប៊ូជីម៉ា (Kuchinoerabujima) ដែលមានទីតាំងស្ថិតនៅចម្ងាយប្រហែល១,០០០គីឡូម៉ែត្រ ភាគនិរតីទីក្រុងតូក្យូ ហើយបានបង្កើនកម្រិតប្រកាសអាសន្នរបស់វាដល់កម្រិត០៤លើ០៥។ ការផ្ទុះលើកចុងក្រោយបំផុតរបស់ភ្នំភ្លើង Shindake បានកើតឡើងកាលពី០៣ឆ្នាំមុន។ ដោយឡែក បច្ចុប្បន្នមានមនុស្សប្រហែលត្រឹម១០០នាក់ប៉ុណ្ណោះ ដែលកំពុងរស់នៅលើកោះនេះ។
គួរជម្រាបថា ជប៉ុនមានភ្នំភ្លើងសកម្មសរុប១១០ ដោយ៤៧ក្នុងចំណោមនោះ ស្ថិតក្រោមការតាមដានជាប់ជានិច្ច៕
