អ្នកស្លាប់កើនដល់ជិត១០០នាក់ និង២៣៦នាក់រងរបួស ក្រោយគ្រោះរញ្ជួយដីនៅឥណ្ឌូណេស៊ី - សមាគម វិទ្យុ​ និងទូរទស្សន៍សំលេងជនពិការភ្នែក (VOB)

Mobile Menu

Top Ads

ចន្លោះទំនេរ សម្រាប់ដាក់ពាណិជ្ជកម្ម

អត្ថបទ និងព័ត៌មានថ្មីៗ

logoblog

អ្នកស្លាប់កើនដល់ជិត១០០នាក់ និង២៣៦នាក់រងរបួស ក្រោយគ្រោះរញ្ជួយដីនៅឥណ្ឌូណេស៊ី

06/08/2018
(ហ្សាការតា)៖ ចំនួនអ្នកស្លាប់​ បានកើនដល់៩៨នាក់ហើយ បន្ទាប់ពីគ្រោះរញ្ជួយដីដ៏ប្រល័យមួយបានវាយប្រហារលើកោះ ទេសចរណ៍​ដ៏ល្បី លុមបុក (Lombok) ស្ថិតនៅភាគ​កណ្តាលនៃប្រទេសឥណ្ឌូណេស៊ី កាលពី​ថ្ងៃអាទិត្យ។ នេះបើតាមអាជ្ញាធរ​ឥណ្ឌូណេស៊ី​ ដកស្រង់ដោយ​សារព័ត៌មាន CGTN​ នៅយប់ថ្ងៃចន្ទ ទី០៦ ខែសីហា ឆ្នាំ២០១៨។
យោងតាមអាជ្ញាធរ​ឥណ្ឌូណេស៊ី​ មនុស្ស ២៣៦នាក់ទៀតបានរងរបួស ដោយសារតែគ្រោះ​រញ្ជួយកម្រិត ៧.០រ៉ិចទ័រនេះ ដែលបាន បំផ្លាញអគារ ផ្ដាច់ចរន្តអគ្គិសនី ហើយវាបានកើត​ឡើងតែមួយសប្ដាហ៍​ប៉ុណ្ណោះ ក្រោយគ្រោះ​រញ្ជួយដីមួយផ្សេងទៀតបានផ្ដាច់ជីវិត មនុស្ស១៦នាក់ នៅលើកោះ​លុមបុក (Lombok) ដដែលនេះ។ លើសពីនេះទៅទៀត ភ្ញៀវទេសចរច្រើន​​​ជាង ២,០០០នាក់ ក៏ត្រូវបានជម្លៀសខ្លួនចេញពីកោះ Gili ស្ថិតនៅក្បែរកោះលុមបុក ទៅកាន់កន្លែងមានសុវត្ថិភាពផងដែរ។ 
គួរជម្រាបថា បើតាមទីភ្នាក់ងារ​ស្ទាបស្ទង់ភូមិសាស្រ្ត​អាមេរិក USGS គ្រោះរញ្ជួយផែនដី​ខាងលើ​មានឥទ្ធិពល ​៧.០​រ៉ិចទ័រ និងមានជម្រៅ​ ១០គីឡូម៉ែត្រ​ក្រោមផ្ទៃដី។ អំឡុងប៉ុន្មាន​សប្តាហ៍​ចុងក្រោយនេះ គេសង្កេត​ឃើញថា ភាគកណ្តាល​ប្រទេសឥណ្ឌូណេស៊ី បានទទួលរង​​គ្រោះពីរញ្ជួយដីយ៉ាង​ញឹកញាប់ ដោយកាលពីចុង​ខែកក្កដាកន្លងទៅ គ្រោះរញ្ជួយដីមួយ​កម្រិត​​ ៦.៤រ៉ិចទ័រ ដែលមាន​ជម្រៅត្រឹម ០៧គីឡូ​ម៉ែត្រ​​ប៉ុណ្ណោះនោះ បានវាយប្រហារ​លើ​កោះទេសចរណ៍នេះ និងបានផ្តាច់ជីវិតមនុស្ស​យ៉ាងតិច ១៦នាក់ និងបណ្តាលឲ្យ​រ​បួស​ជាង​​ ១៦០នាក់។
គ្រោះរញ្ជួយដី​​តែងកើត​មានឡើង​ជាញឹកញាប់ នៅប្រទេស​អាស៊ានមួយនេះ គឺដោយសារតែ​ឥណ្ឌូណេស៊ី មានទីតាំងភូមិសាស្រ្ត ស្ថិត​​នៅចំពីលើតំបន់ខ្សែ​ក្រវាត់ភ្នំភ្លើង​ ដែលគេហៅថា Pacific Ring of Fire ដែលមានសណ្ឋានដីងាយរងគ្រោះធម្មជាតិ​ខ្លាំងជាងគេ​លើផែនដីដូចជា រញ្ជួយដី បន្ទុះភ្នំភ្លើង និងរលកយក្សស៊ូណាមិជាដើម៕