ទីបំផុតលោក Lopez Obrador ជាប់ឆ្នោតក្លាយជាប្រធានាធិបតីថ្មីរបស់ម៉ិចស៊ីកូ ខណៈលោក ដូណាល់ ត្រាំ ផ្ញើសារអបអរក្នុងនាមអ្នកជិតខាង!
02/07/2018
(ម៉ិចស៊ីកូ)៖ ទីបំផុតយោងតាមលទ្ធផលបឋមភ្លាមៗ ក្រោយការបោះឆ្នោតបានបង្ហាញឲ្យឃើញថា លោក ឡូប៉េស អូប្រាដ័រ (Lopez Obrador) ដែលជាអ្នកនយោបាយឆ្វេងនិយម បានទទួលជ័យជម្នះជាមួយសំឡេងគាំទ្រជាង ៥០ភាគរយ នៅក្នុងការបោះឆ្នោតថ្នាក់ជាតិដ៏ធំជាងគេបំផុត ក្នុងប្រវត្តិសាស្រ្តនៅប្រទេសម៉ិចស៊ីកូ។ នេះបើតាមការដកស្រង់ការផ្សាយចេញពី ទីភ្នាក់ងារព័ត៌មាន Reuters នៅព្រឹកថ្ងៃចន្ទ ទី០២ ខែមិថុនា ឆ្នាំ២០១៨។
សម្រាប់លោក ចូស អាន់តូនីញ៉ូ មែអែដ (Jose Antonio Meade) ដែលជាបេក្ខភាពមកពីគណបក្សកាន់អំណាចនិយមកណ្តាល PRI បានប្រកាសចុះចាញ់ភ្លាមៗ បន្ទាប់ពីការបោះឆ្នោតបានបិទបញ្ចប់ ហើយទទួលស្គាល់ថា ជ័យជម្នះនឹងបានទៅលើលោក អាន់ឌ្រែស ម៉ានូអែល ឡូប៉េស អូប្រាដ័រ (Andres Manuel Lopez Obrador) វ័យ ៦៤ឆ្នាំ ដែលជាអតីតអភិបាលក្រុងម៉ិចស៊ីកូ-ស៊ីធី។ ចំណែកឯបេក្ខភាពដទៃៗទៀត ក៏បានប្រកាសចុះចាញ់ដូចគ្នាដែរ។
គួរជម្រាបថា លោក Lopez Obrador នឹងក្លាយជាប្រធានាធិបតីបន្តពីលោក អ៊ែនរីក ផេណា នៀតូ ( Enrique Pena Nieto) ដែលចប់អាណត្តិ ហើយក្នុងឱកាសនេះលោក Nieto ផ្ទាល់ ព្រមទាំងប្រធានាធិបតីអាមេរិកលោក ដូណាល់ ត្រាំ ដែលជាអ្នកជិតខាងនឹងគ្នា ក៏បានចូលរួមផ្ញើសារអបអរសាទរផងដែរ៕
