លោក ហ៊ុន មានី ទទួលគ្រឿងឥស្សរិយយស «Padma Shri» ពីប្រធានាធិបតីឥណ្ឌារួចហើយ ខណៈលោកនឹងនាំពានរង្វាន់នេះ មកដល់ប្រទេសកម្ពុជា នៅយប់នេះ

(ភ្នំពេញ)៖ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក) បានទទួលគ្រឿងឥស្សរិយយស Padma Shri ចំពោះស្នាដៃឆ្នើមក្នុងកិច្ចការសាធារណៈ ពីប្រធានធិបតីឥណ្ឌារួចហើយ ខណៈលោកនឹងនាំយកពានរង្វាន់នេះ ត្រឡប់មកដល់កម្ពុជាវិញ នៅម៉ោង៧៖៤៥នាទីយប់ ថ្ងៃទី០៣ ខែមេសានេះ។

លោក ហ៊ុន ម៉ានី បានបង្ហោះរូបភាពនៃការទទួលគ្រឿងឥស្សរិយយស Padma Shri នៅប្រទេសឥណ្ឌាថា លោកឈរទទួលបានពានរង្វាន់នេះ គឺតំណាងឲ្យប្រទេសកម្ពុជា និងជាមោទនភាពមួយរបស់កម្ពុជា ។ ពិធីប្រគល់ពានរង្វាន់នេះ មានការចូលរួមពីលោកប្រធានាធិបតីឥណ្ឌា និងមន្ត្រីជាន់ខ្ពស់ឥណ្ឌាជាច្រើនរូប ធ្វើជាសាក្សីផងដែរ។

សូមជម្រាបថា នៅម៉ោង៧៖៤៥នាទី យប់នៅថ្ងៃទី០៣ ខែមេសានេះ ស.ស.យ.ក ក៏នឹងធ្វើសន្និសីទសារព័ត៌មាន នៅអាកាសយានពដ្ឋានអន្ដរជាតិភ្នំពេញ ដើម្បីបញ្ជាក់ពីការទទួលបានពានរង្វាន់ «Padma Shri» នេះផងដែរ៕