ខេត្តកណ្ដាល ៖ រថយន្តមួយគ្រឿងបើកបរក្នុងល្បឿនលឿនបានទៅបុកម៉ូតូ៥គ្រឿង ដែលចតឈរដោយឲ្យសិស្សដើរឆ្លងផ្លូវ និងអ្នកដើរឆ្លងផ្លូវ បណ្ដាលឲ្យរបួសធ្ងន់ស្រាល១៤នាក់ កាលពីម៉ោង១០ និង៥០នាទីព្រឹក ថ្ងៃទី០៦ ខែមីនា ឆ្នាំ២០១៨នេះ លើកំណាត់ផ្លូវជាតិលេខ៦ ចន្លោះគីឡូមែត្រលេខ៣១-៣២ ស្ថិតក្នុងភូមិសាមគ្គី ឃុំព្រែកដំបង ស្រុកមុខកំពូល ខេត្តកណ្តាល។
នគរបាលចរាចរណ៍ស្រុកមុខកំពូលបានឱ្យដឹងថា ពេលកើតហេតុខាងលើនោះ គឺបង្កឡើងដោយរថយន្តមួយគ្រឿង ពណ៌ស ពាក់ស្លាកលេខ ភ្នំពេញ3D-៣៤៦០ (អ្នកបើកបររត់គេចខ្លួនបាត់) ធ្វើដំណើរពីជើងទៅត្បូង ក្នុងល្បឿនលឿន លុះមកដល់ចំណុចកើតហេតុ បានមកបុកម៉ូតូសណ្ដោងរ៉ឺម៉កចំនួន០១គ្រឿង និងបន្តបុកម៉ូតូ៤គ្រឿង ដែលឈប់ស្ងៀមចាំឱ្យសិស្សដើរឆ្លងផ្លូវ បណ្ដាលឲ្យរបួសមនុស្ស១៤នាក់ ស្រី០៨នាក់ របួសធ្ងន់០៣នាក់ ស្រី០២នាក់ ស្រាល១១នាក់ ស្រី០៦នាក់។
រថយន្ត១គ្រឿង ម៉ូតូ០៤គ្រឿង ម៉ូតូសណ្ដោងរ៉ឺម៉ក១គ្រឿងដែលខូចខាត។ ក្រោយពេលកើតហេតុ តៃកុងរថយន្តបង្កហេតុបានរត់គេចខ្លួនបាត់ ហើយបន្សល់ទុកអ្នករងរបួសត្រូវបានគេបញ្ជូនទៅសង្គ្រោះនៅមន្ទីពេទ្យ។ ចំណែករថយន្តបង្ក សមត្ថកិច្ចយកមករក្សាទុកនៅអធិការដ្ឋាននគរបាលស្រុក ដើម្បីបន្តនីតិវិធី។
