ឡាន Mercedes-Maybach Pullman មួយគ្រឿងដំបូងគេនៅកម្ពុជា តម្លៃថ្លៃកប់មេឃ! ! !
13/02/2018
ភ្នំពេញ ៖ ក្រៅពី McLaren 720s ដែលមានតម្លៃជាងកន្លះលានដុល្លារ កាលពីម្សិលមិញនេះមានរថយន្តតម្លៃថ្លៃកប់ពពកមួយទៀតបានបង្ហាញខ្លួនលើទឹកដីប្រទេសកម្ពុជា ដែលជារថយន្តម៉ូដែល Mercedes-Maybach Pullman ពណ៌ទឹកមាស។
Maybach Pullman នេះអាចនិយាយបានថាជារថយន្តមានតែមួយគ្រឿងគត់ក្នុងប្រទេសកម្ពុជា ហើយវាមានបំពាក់នូវចំណុចពិសេសៗជាច្រើន។ រថយន្តនេះមានប្រវែងសរុបដល់ទៅ ៦,៥ ម៉ែត្រ វែងជាងរថយន្ត Mercerdes-Benz S-Class ១,២ ម៉ែត្រឯណោះ។
ជាកម្រិតស្តង់ដារ Pullman មានកៅអីអង្គុយចំនួនពីរបែរទៅខាងមុខ និងកៅអីអង្គុយចំនួនពីរទៀតបែរទៅខាងក្រោយ ដែលកៅអីបែរទៅក្រោយនេះអាចបត់បានដើម្បីឲ្យរថយន្តមានចន្លោះទំនេរច្រើន។ អតិថិជនក៏អាចមានជម្រើសដកកៅអីបែរទៅក្រោយនេះចេញបានផងដែរ។
ផ្នែកខាងក្រោយនេះមានទំហំធំទូលាយបំផុត បើប្រៀបធៀបនឹងរថយន្តប្រភេទដូចគ្នា ជាពិសេសរថយន្ត Rolls-Royce។ នៅផ្នែកខាងក្រោយនេះមានឧបករណ៍ចំនួន ៣ នៅលើដំបូល ដែលអាចឲ្យអ្នកដំណើរដឹងពីសីតុណ្ហភាពខាងក្រៅ, ល្បឿនរថយន្ត និងម៉ោង។ របាំងដែលខណ្ឌចែករវាងអ្នកដំណើរ និងអ្នកបើកបរ អាចប្រែពីកញ្ចក់ថ្លាទៅជាស្រអាប់បានដោយគ្រាន់តែចុចប៊ូតុងមួយ។
ចំពោះប្រព័ន្ធសំឡេងមាន ២ ប្រភេទដែលបានបំពេញតម្រូវការខុសៗគ្នារបស់អតិថិជន ដោយមានជាប្រព័ន្ធសំឡេង Burmester® អាចបញ្ចេញសំឡេងប្រភេទ Surround Sound និងមានភាពច្បាស់ល្អ។ ជម្រើសដែលល្អជាងនេះទៅទៀតនោះគឺប្រព័ន្ធសំឡេង Burmester® High-End ដែលបញ្ចេញសំឡេងបានច្បាស់ និងបញ្ចេញសំឡេង Surround Sound បែប 3D តែម្ដង។
រថយន្តនេះដំណើរការដោយម៉ាស៊ីន Twin-Turbo ស៊ីឡាំង ១២ ចំណុះ ៦,០ លីត្រ ដែលបង្កើតកម្លាំងបាន ៥៣០សេះ ដែលមានសំឡេងស្ងាត់ល្អជាទីបំផុត។ នៅលើទីផ្សារអឺរ៉ុបរថយន្តនេះមានតម្លៃក្បែរកន្លះលានអឺរ៉ូ (ក្បែរ ៦០ ម៉ឺនដុល្លារ)។ មកដល់ទីផ្សារប្រទេសកម្ពុជាអាចមានតម្លៃដល់ក្បែរ ១ លានដុល្លារ ដោយគិតលើតម្លៃពន្ធអាករ រួមទាំងតម្លៃដឹកជញ្ជូនតាមយន្តហោះ។
