ខេត្តត្បូងឃ្មុំ ៖ ពិតជាគួរឲ្យសង្វេគណាស់ដោយសិស្សស្រីរៀនថ្នាក់ទី៣ម្នាក់ ឈ្មោះ កៅ គឹមហ៊ាន អាយុ១២ឆ្នាំ នៅនៅត្រង់ចំណុចអូរត្រង់ ក្នុងភូមិត្រពាំងព្រីង ឃុំត្រពាំងផ្លុង ស្រុកពញាក្រែក ត្រូវបានសំយាបបេតុងផ្ទះថ្មបាក់សង្កត់លើ បណ្ដាលឲ្យរងរបួសធ្ងន់ធ្ងរហូរឈាមស្រោចពេញខ្លួន បណ្ដាលឲ្យស្លាប់ពេលបញ្ជូនទៅសង្គ្រោះនៅប្រទេសវៀតណាម ។
ប្រជាពលរដ្ឋរស់នៅជិតខាងផ្ទះកើតហេតុ ប្រាប់ឲ្យដឹងនាព្រឹកថ្ងៃទី២៥ ខែមករា ឆ្នាំ២០១៨ ថា ផ្ទះល្វែងខាងលើនេះដំបូងជាកម្មសិទ្ធរបស់អ្នកដ៏ទៃ ត្រូវបានម្តាយរបស់ក្មេងស្រីរងគ្រោះបានទិញគេ និងបានចូលនៅប្រមាណជា១ខែនេះទេ ។ ស្រាប់តែនៅរសៀលថ្ងៃទី២៤ ខែមករា ឆ្នាំ២០១៨ ពេលដែលក្មេងឈ្មោះ ហ៊ាន ដើរកាត់ពីក្រោមត្រង់ច្រកចូលខាងមុខ ដែលមានដំបូលប្រកដែកពីមុខ ចៃដន្យស្រាប់តែបាក់សំយាបថ្មបេតុងមកសង្កត់លើក្មេងស្រីកូនម្ចាស់ផ្ទះ ភ្លាមៗនោះ បណ្តាលឲ្យមានការភ្ញាក់ផ្អើលដល់ពលរដ្ឋក្បែរខាង ។
អ្នកជិតខាងបានប្រាប់បន្តថា ហើយបាននាំគ្នាប្រឹងគាស់លើកសំយាបបេតុងចេញ យកក្មេងស្រីរងគ្រោះបញ្ជូនទៅសង្គ្រោះនៅមន្ទីរពេទ្យស្រុក និងបាននាំមកសង្គ្រោះទៅកាន់ប្រទេសវៀតណាម តែបានស្លាប់តាមផ្លូវ ក៏ដឹកត្រលប់មកផ្ទះវិញ ដើម្បីរៀបចំធ្វើបុណ្យទៅតាមប្រពៃណី ។
រហូតមកដល់ព្រឹកថ្ងៃទី២៥ ខែមករា ឆ្នាំ២០១៨ មានសិស្សប្រុសស្រីព្រមទាំងអ្នកគ្រូផងដែរ បានមកចូលរួមដង្ហែសពយកទៅបញ្ចុះនៅខាងក្រោយផ្ទះចាស់ដែលស្ថិតនៅក្បែរគ្នានោះ ។ អ្នកជិតខាងបានប្រាប់បន្ថែមថា សំយាបបេតុងផ្ទះខាងមុខនោះ ត្រូវបានជាងសំណងធ្វើការខ្ជីខ្ជាដោយខ្វះបទដ្ឋានបច្ចេកទេស មិនបានដាក់តដែកមកភ្ជាប់ជាមួយនឹងសសរឡើយ ។ គឺបានចាក់បេតុងរៀបឥដ្ឋបន្ទុកពីលើដែលមានទម្ងន់រាប់តោន ហើយកាលពីមួយឆ្នាំមុនផ្ទះកើតហេតុ ធ្លាប់ត្រូវបានរថយន្តធុន១គ្រឿងក្នុងពេលដែលកំពុងតែបើកបរតាមផ្លូវថ្នល់មុខផ្ទះសុខៗ ស្រាប់តែក្រឡាប់មកសង្កត់បាក់របងបេតុងនៅជាប់ផ្ទះកើតហេតុនេះ ដោយមានស្នាមប្រេះថែមទៀតផង ។
អ្នកជិតខាងបញ្ជាក់ថា ស្ត្រីជាម្តាយរបស់ក្មេងស្រីខាងលើនេះ មានកូនតែ២នាក់ក្នុងនោះប្រុសបងគេធ្លាប់បានជួបនឹងហេតុការណ៏គ្រោះថ្នាក់ចរាចរ ត្រូវរថយន្តបុក ត្រូវក្បាលយ៉ាងដំណំមិនទាន់នឹងជាផង ។ ស្រាប់តែទុក្ខត្រួតលើទុក្ខដោយកូនស្រីពៅគេ ត្រូវបានសំយាបផ្ទះបេតុងបាក់សង្កត់លើ បណ្ដាលឲ្យស្លាប់ម្តាយបានយំទួញសង្វេកអាណិតខ្លោចចិត្ត ចំពោះកូនស្រីរបស់ខ្លួនណាស់ ។