ក្រសួងការពារជាតិ (ទ័ព) បានសម្រេចមិនបន្តកុងត្រាជាមួយកីឡាករកូរ៉េខាងជើងទាំង៤នាក់ សម្រាប់រដូវកាលថ្មី បន្ទាប់ពីខកចិត្តបានត្រឹមជើងឯករងលីគកំពូលពីររដូវកាលជាប់គ្នាឡើយ។
លោក ខូវ ឆាយ អ្នកចាត់ការទូទៅក្រសួងការពារជាតិបានឲ្យដឹងថា ក្រោយទទួលបានត្រឹមជើងឯករងចំនួនពីររដូវកាលជាប់គ្នាឆ្នាំ២០១៦ និង២០១៧ ធ្វើក្រសួងការពារជាតិមិនទាន់ពេញចិត្តចំពោះលទ្ធផលនេះ ក៏សម្រេចមិនបន្តកុងត្រាយកកីឡាករកូរ៉េខាងជើងទាំង៤នាក់ចេញ ដោយផ្ដោតយកកីឡាករល្អជាងនេះសម្រាប់រដូវកាលថ្មី។
លោកបញ្ជាក់ថា ទិសដៅរបស់ទ័ពនាឆ្នាំក្រោយគឺជើងឯក ហើយកីឡាករដែលមកដល់ថ្មីរដូវកាលក្រោយនេះក៏ត្រូវតែល្អជាងមុន។ មួយទៀតលោកចង់បានកីឡាករថ្មីៗ ដែលអាចឲ្យទម្រង់លេងរបស់ក្លឹបកាន់តែប្រសើរឡើងជាងមុនផងដែរ។
កីឡាករកូរ៉េខាងជើងដែលទ័ពមិនបន្តកុងត្រាគឺមាន ខ្សែប្រយុទ្ធ Choe Myong-ho, ខ្សែបម្រើ Kim Kyong-hon, ខ្សែប្រយុទ្ធ Ri Hyok-chol និងខ្សែការពារ Jang Song-hyok នឹងទៅចូលរួមជាមួយ វិសាខា ។ ចំណែកកីឡាករថ្មីដែលក្លឹបនេះកំពុងត្រៀមធ្វើតេស្តគឺមានមកពីជប៉ុន កូរ៉េខាងត្បូង និង អឺរ៉ុប៕